Faa-Samoa

E $2,000 le taui tupe mo se faamatalaga sa’o i lē sa gaoia le $20,000 mai le Ninety Nine Shop

"E iai le taui ua folafola e le pule e $2,000 tala mo le tagata na te faailoa se faamatalaga sa'o e fesoasoani i suesuega a alii Malu o le Malo.

Ganasavea Manuia Tafeaga

December 28, 2024

4225

E silia le $20,000 tala le tino i tupe na toesea faatasi ma le taavale i le vaveao o le kerisimasi mai se tasi o pisinisi, peitai, ua toe maua le taavale ao loo tausailia pea le seleni faatasi ma le tagata na ia faatino le soligatulafono.

O le kamupani ua faaigoaina o le Ninety Nine Shop i Saleufi, na osofai e se alii talavou i le vaveao o le Aso Lulu o le Kerisimasi lava lea.

O se faamalamala i le potu o le faleui, (toilet) na ui atu ai lea alii, ma faaaoga le avanoa e oso atu ai i totonu.

Sa iloa atu i masini pue ata (video security cameras) le agai sao i le masini o loo totogi ai faatau.

O ata video o loo maitauina ai, sa iloa lelei e lea talavou numera sa ia faaaogaina e matala ai le pusa tuu tupe.

I le molimau a lē ona le pisinisi, e silia ma le $20,000 tala, faatasi ai ma le ki o le taavale a le kamupnai sa paka i fafo i luma o le faleoloa.

E le’i avanoa le alii pule o le Ninety Nine Shop mo se faamatalaga, peitai, na taua i se tasi o le aufaigaluega ia Si’u Malotutoasi, o le Aso Faraile na toe maua ai e leoleo le taavale o le ituaiga Toyota Raize SUV.

Sa maua atu i Vaiusu, ae o loo tausailia pea le tino i tupe faapea le alii sa ia faatinoina le soligatulafono.”

E le o mafai ona maua foliga a lē sa ia ulufale faamalosi i totonu o le faleoloa.

O se ofu vae uumi lanu uliuli ma se ofu lima uumi foi lanu uliuli pa’epa’e sa ia ofuina. O seevae silipa (sport shoes) o totigi lima (gloves) ma se mata pulepule (mask) sa ia faaogaina.

E paee le tagata sa agai mai i fafo ma le ki ma alu ese ai loa ma le taavale.

Taua e Si’u, “E iai le taui ua folafola e le pule e $2,000 tala mo le tagata na te faailoa se faamatalaga sa’o e fesoasoani i suesuega a alii Malu o le Malo.