Faapaia le Malumalu $20 Miliona Tala a le Ekalesia Worship Centre Christian Church Worldwide

0
2545

30 April 2022, Apia Samoa. O le aso mulimuli o le masina o Aperila na faapaiaina ai le malumalu a le Ekalesia Worship Centre Worldwide i Mulinuu, ina ua maea le galuega e lata i le $20 miliona tala lona tau aofai.

Worship Centre Christian Church Worldwide opens its Church building in Samoa. Photo: Ganasavea Manuia Tafeaga.

O se galuega sa faatino lava ma loimata, sa tele foi ni luitau na feagai ma le faatinoga o itu eaeese, peitai, sa galulue punouai lava ona o le fale o Le Atua. O se molimau lea a le faletua ia Lavina Elaine Mafoe.

Saunoa le faletua ia Lavina, o le tausaga 1990 na faailoa ai e Le Atua se faaaliga i le Aposetolo Viliamu Mafoe, ina ia faatu se Ekalesia e molimau atu i le aao fai vavega o Le Atua. I lea taimi, o loo avea Viliamu Mafoe ma Faatonu o le Faalapotopotoga Talavou mo Keriso (Youth for Christ). I le aso 26 o Iulai i le tausaga 1997, na tatala aloaia ai loa mo le taimi muamua le Ekalesia Worship Centre Samoa.

Sa molimau le faletua, o lea sauniga sa faatino i le fale ua faaigoaina o le Tanoa i Matafele. Ae o le amataga mai o lenei Ekalesia sa faaogaina fale ta’alo i Tuanaimato, o le fale o Tina i Savalalo faapea le fale ta’alo i le Apia Park e faatino ai tapuaiga i Aso Sa taitasi ae o le’i fausiaina lea o le galuega tele poo le falesa ua iai nei.

Lavina Elaine Mafoe, 30 April 2022. Photo: Ganasavea Manuia Tafeaga.

“E manatua le agalelei o le Susuga ia Pastor Andy Forsgren i Amerika Samoa, sa aitalafu mai ai le $100,000 lea na amata ai le loan i le faletupe o le ANZ, e totogi ai le tau o le fanua e $2.2 miliona lea ua fausia ai le falesa lenei.

I le tala autu o le galuega sa fofogaina lea e le Susuga i le Faafeagaiga ia Pastor Afualo Misiafe Misty Ioapo.  Sa ia ta’ua o le tauofoga o le fausia o le faavae (foundation) na manumalo ai le Shane Construction mai Samoa i le tau e $1,680,000 – tasi le miliona ono selau ma le valu sefulu afe tala, ma e 11 vaiaso latou te faia ai le faavae. O le 11 o Aperila 2018 na sainia ai le maliliega mo le fausiaina o le faavae.

O le Body Structure na manumalo ai le Ah Liki Construction mo le fausiaina o le tino ma faatotogaina o le fale i se tau e $14,693,456, ae 12 masina e fausia ai le fale, peitai, na ova le taimi, ma sa fai ma taofia le galuega ona o le tuai mai o vaa o loo aumaia ai le tele o vaega o le fale.

Prime Minister Hon Fiame Naomi Mataafa and Hon Tuilaepa Dr Sailele Malielegaoi. Photo: Ganasavea Manuia Tafeaga.

E iai nisi o vaega faaopoopo o le galuega, e faaatoatoa ai le falesa sa faatotogaina e le Ekalesia e pei o le sound system e $300,000, o le telephone system ma le LED screen e $480,000, o le TV ma le video system e $400,000.

O se tuufaatasiga o le tau o le galuega e $20,000,000 i sona tau aofa’i, ma e maoa’e itu eseese uma o lenei falesa. E 65 metre lona umi mai luma e agai i tua, ae 15 metre le maualuga, ma le floor area e 2,500 square metre. E taatia mai ona nofoa i ni sections se tolu, e amata mai lalo ae agai i luga e pei o se stadium, ae faasaga uma nei nofoa i se stage maoae, e le tusa ai ma se isi stage i soo se fale o Samoa. E tolu ni screen tetele o loo iai luga o le stage.

Sa auai foi le Taitaifono a le FAST poo le Minisita o Faatoaga ma Faigafaiva, Laaulialemalietoa Leuatea Schmidt ma lona faletua Heather Schmidt. 📸 Ganasavea Manuia.

I luga ae o nofoa, o loo iai le fogafale aluga, upper level, o loo iai potu faapitoa mo video ma le sound, e tioata atoa, e mafai ai e le aufaigaluega ona iloa mai le stage. E 180 tikeri le view mai ia potu tioata faapitoa. O le falesa, e sound proof atoa. O luga foi i lona fogafale lona tolu, o loo iai potu mo ofisa, faapea se potu faapitoa mo fonotaga – conference room.

O lenei tau e $20 miliona, e le’i faaopoopoina iai le tau o le fanua o loo fausiaina ai nei le galuega. O le tau foi o le fanua, ua silia ma le faatoluina le tele atu nai lo le $2.2 miliona tala sa faatau ai i le silia ma le 20 tausaga talu ai.

O Aposetolo Viliamu Mafoe sa aumaia ai taiala uma o le galuega. O i latou sa galulue autu i le galuega, o Pastor Ricky Westerland (Engineer) o se Sui o le Ekalesia, Pastor Toouta Lalovi (Coodinator), Aloe Vaai & Marie Campell (Project Engineers), kamupani o le Kooline (Mechinal Engineer/Designer), Misa Esoto Electrical (Electrical designer development), Pastor Peni Taua’anae (Telephone system), Pastor Faamanatu Tuitaalili (Video/TV), ma Pastor Manasa Aloalii (Sound Sytem).

Aposetolo Viliamu Mafoe. 30 Aperila 2022. Photo/Ganasavea Manuia Tafeaga.

O le faapaiaina o le malumalu na vaaia ai le auai o nisi o le au valaaulia e pei o le afioga i le Palemia, Hon Fiame Naomi Mataafa, le afioga ia Tuilaepa Sailele Malielegaoi, faapea le afioga ia Laaulialemalietoa Polataivao Fosi Schmidt ma lona faletua, faapea nisi o faauluuluga o Ekalesia ma kamupani i Samoa.

O le faletua ia Lavina Elaine Mafoe sa ia ootiina le lipine, ona ulufale ai lea o le mamalu o le au valaaulia.

O lea foi sauniga na vaaia ai le Susuga i le Aposetolo Viliamu Mafoe, o ia faa’aogaina se wheelchair ona ua le atoaatoa lona malosi. Sa mafai ona saunoa le Aposetolo e molimauina le alofa ma le agalelei o Le Atua fai vavega, i le iai pea o ona aao i luga o le Ekalesia Worship Centre, i nei tausaga e tele, talu ona tuuina mai le feau a Le Atua i le Aposetolo. O le tausaga nei, e atoa iai le 65 o tausaga o le soifua o Aposetolo Viliamu Mafoe.

O tofiga nei o le Ekalesia Worship Centre Christian Church Worldwide

1. Aposetolo Viliamu Mafoe – Taitaifono

2. Pastor Too Aloalii – Sui Taitaifono, Melbourne Australia

3. Pastor Faamatua Moau – Failautusi, Brisbane

4. Pastor Livi Eneliko – Sui Failautusi, Auckland

5. Matamua Atipa – Teutupe, Apia

6. Pastor Ken Faleao – Sui Teutupe, Melbourne

7. Alaia’sa Sepulona Monanu – Suetusi, Apia