21 Oketopa 2020. O le vaiaso nei sa tu’uina mai ai se fa’aaliga fa’alaua’itele a lē sa avea ma Sui Palemia o Samoa, e fa’ailoa ai lona lagolagoina o se tasi o vaega fa’aupufai fou, le Fa’atuatua i le Atua Samoa ua Tasi (FAST).
O lea ua maea ona taliaina aloa’ia e le Ofisa o Faiga Palota le resitalaina o le suafa o le Afioga i le Sa’o Fa’apitoa, Fiamē Naomi Mata’afa, e avea ai ma se tasi o sui tauva mo le faipalota tele a le atunu’u i le tausaga fou.
I lenei pepa o fa’amatalaga (press release) na saunoa ai le Afioga ia Fiame ua resitalaina o ia o se Sui Tauva Tuto’atasi ona o ni tulafono fou ua faaofiina mai e ono afaina ai le saogalemu ma le faaauau pea o le nofoa o lona Itumalo, a o tālia le fa’ata’apeina o le Palemene i le tausaga fou.
O loo saunoa manino mai le Afioga i le Sa’o Fa’apito, o ia na te lagolagoina ma amana’ia tele le Vaega Fa’aupufai a le FAST, ma e foliga mai o le a auai atu Fiame e lagolago le FAST, pe a fa’ata’ape le Palemene.
“Ua mae’a foi ona o’u fa’ailo i lo’u Itumalo, e telē lo’u amana’ia o le Vaega Fa’aupufai a le Fa’atuatua i le Atua Samoa ua Tasi-FAST; ae ona o tulafono, e ao ai pea ona talia seia fa’ata’ape le Palemene.”
Sa toe fa’ailo ai foi e lē sa fai ma Minisitā i ni tausaga se tele, lona fa’anaunauta’iga e resitala o se Sui Tuto’atasi ona o le fia faia o sona sao i le talanoaina o Tulafono Tau Fa’aofi e 3 lea na mafua ai lava ona fa’amavae mai le Kapeneta i le aso 11 o le masina ua mavae.
“E maualuga foi se lagona e fai se sao i le taimi e talanoaina ai Tulafono Tau Fa’aofi e 3 lea na mafua ai ona ou fa’amavae mai le Kapeneta, ona o a’afiaga ogaoga i lo tatou atunu’u pe afai ae pasia”.
“Ae ia tatou nofo tatalo, ma fa’anōnō manū i le Atua, ia sao ma uli le fa’amoemoe o le tatou atunu’u i lana faiga filifiliga o loma nei, aua se Malo fou mo lo tatou atunu’u”.
O le Aso Faraile nei o le a tapunia aloa’ia ai le resitalaina o suafa o i latou uma lea ua fuafua e tauva mo le faigapalota o le tausaga fou.
ma o lea o lo’o ua aumai ai le lagolago a le afioga ia Fiame e tusa o le vala’aulia a le FAST mo ia, peita’i e tatau ona taga’i i le tulafono i a’afia ai le nofoa o lona itumalo, ma fa’atalitali se’ia fa’ata’ape le Palemene ia Ianuari o le tausaga fou.
(9)
