Ua faailoa mai e le Matagaluega o Leoleo le faaitiitia ai o soligatulafono ua tulai mai, talu ona taofia le gaosiaina ma le faatau atu o nisi o ava malosi e pei o se faaiuga a le Komiti e Pulea Ava Malosi (Liquor Control Board).
I se feiloaiga ma le Sui Komesina ia Papalii Monalisa Tiai-Keti, sa ia tāua ai, “O le taofia ai e le Komiti o ava malosi taugofie, ua maitauina ai e le Matagaluega le faaitiitia lea o soligatulafono e tulai mai.
O Aperila o le tausaga nei, sa taofia ai e le Komiti e Pulea Ava Malosi i Samoa e gaosiaina o vodka i totonu o Samoa e pei o le Rover ma le Boom Voka.
Sa tā’ua e le Sui Palemia o ia foi o le Taitaifono o le Komiti o Ava Malosi, Hon Tuala Tevaga Iosefo Ponifasio, o nei ava malosi sa maua ai se vailaau o le mathanol e afaina ai le soifua maloloina o le mafaufau, ma galo ai i tagata latou mea sa fai.
Saunoa le Sui Komesina, o nei ava malosi sa tele ina aafia ai nisi o le mamalu o le atunuu, aua e malolosi atu pasene nai lo pasene faatulagaina, ae le tusia foi le pasene (percentage alcohol) i luga o fagu.
A lineup of locally made vodka on the shelf of a local store. The labeling does not include the alcohol content.
“Soo se faalavelave e lipotia mai i le Ofisa ma faasolo foi iai suesuega a le Matagaluega, ma māua ai lava, o ava malosi lava nei, ae lē o faailoaina pasene o loo gaosia ai..
“Ae o le faapogai lea o faalavelave, peitai, o le laa ai o le Komiti o Ava Malosi i lea tulaga, ua manino mai ai le pa’ū maualalo o soligatulafono.”
O se itu na faafetaia ai e Papalii lenei faaiuga ma saunoa le Sui Komesina, e fia momoli le faafetai i le Komiti ona o le silasila mamao i itu e faasaoina ai le faatuputupula’ia o faalavelave i totonu o le atunuu ma ma’imau ai soifua o tagatanuu.
O le masina na tea nei sa faailoa mai ai e le Komiti le faatauina ese atu lea o ni pailate ava malosi sa taofia e le Ofisa o Tiute ma faatino iai ni suesuega poo ai o loo i tua o le faaulufaleina mai o nei ava malosi.
Ina ua maea suesuega sa faatauina i se feofoofoaiga (public tender) mo le faa’aogaina ae le faatagaina ona toe faatau ese atu e se isi.
Sa tā’ua e le Sui Komesina, o le ava malosi o le Taula lea o loo ua iai faamaumauga o loo ua faa’aogaina nei e le mamalu o le atunuu mo fiafiaga ma faasiliga malosi foi mai le mamafa o tiute ma galuega.
O le gaosiaina o le Taula sa tuuina mai e se lipoti a le Komiti e Pulea Ava Malosi, o loo lelei ma atoatoa itu uma o tapenega e pei o le malosi o le ava, faapea le tūmāmā o lea fale gaosi ava.
I le alo atu o le atunuu i aso faailogaina, ua toe aumai ai foi se tuualalo mai le Sui Komesina ina ia tautuana le taumafaina o le ava, ae ia iloa foi ona pulea tatau le taumafaina o le ava malosi.
