“E le Taliaina e le Matagaluega o Leoleo ni Faamatalaga Mai Itulau Faafoliga poo Fake Pages

"O loo matauina, e pei o lea e fa'aaoga mai e i latou e lagolagoina itu e lua o le polokiki fake pages nei, e osofai ai le isi itu agai i le isi itu.."

0
471
Police Commissioner Auapaau Logoitino Filipo.

“E le taliaina e le Matagaluega o Leoleo ni faamatalaga mai itulau faafoliga poo fake pages.”

O le saunoaga lea a le Komesina o le Matagaluega o Leoleo, le Afioga ia Auapaau Logoitino Filipo.

Saunoa Auapaau, o loo matauina, e pei o lea e fa’aaoga mai e i latou e lagolagoina itu e lua o le polokiki fake pages nei, e osofai ai le isi itu agai i le isi itu.

“Ae o nisi o nei mataupu, ua peiseai o le a fai i luga o le social media le faaiuga o se mataupu..”

Saunoa le Komesina o Leoleo, “O le isi itu, ua pei ua fa’aaoga itulau faafoliga nei e osofa’i mai ai le Matagaluega pe lalafo mai ai foi ni faamatalaga.”

“O loo tilotilo pea iai le matagaluega, ae avatu faafautuaga e aua nei galo, ia tautuana le tulafono.”

O le tele o fake pages e pei ona tā’ua e le Komesina o Leoleo, e mātuia tuuaiga lē faavaea o loo iai, ma mamafa saunoaga o loo momoli mai ai e oo lava i upu palauvale. O le tele foi o le gagana o loo faaaogaina, e toia ai le va ma leiloa ai se faakerisiano.

I se faatalanoaga ma le Komesina sa ia teena ai le faamatalaga o loo faasalalau ma faalauiloa i luga o itulau faafoliga, lea e aafia ai le faletua o le afioga ia Vaele Paia’aua Iona Sekuini, ua maliu.

O le faamatalaga ua salalau i luga o nei itulau faafoliga, o loo tuuaia ai e faapea na oo atu le faletua o Vaele e faailoa atu i leoleo, o Vaele na maliu ai Ituau Malaitino, si alii talavou lea na maliu i Vaitele iā Aperila 2021 i le hit n run.

O le tuualalo a le Komesina, “Aua nei galo, e iai le freedom of speech, ae e iai foi ē e ono aafia i le tulafono i ni faamatalaga lalafo i se tasi, aemaise lava pe afai e aafia ai se faasinomaga o se isi..

“E te aafia i le tulafono pe afai e te lalafo ni upu ma fai ni tuuaiga sese e tauleagaina ai se isi, aemaise o tuuaiga lē faavaea.”

O mataupu o loo faaalia ai finagalo a le atunuu e le mafai ona faamaonia e le Matagaluega ona o loo felafoai i luga o fake pages e leiloa atu poo ai o loo i tua atu ai.