O le Matagaluega o Leoleo, Ofisa o le Loia Sili, Ofisa o le Komesina o Sulufaiga faapea le Matāgaluega a le Palemia ma le Kapeneta – o matāgaluega uma nei e fā o loo faaulu nei iai se tagi i se tino i tupe e $1.8 miliona tala a sē tasi o tamalii faipisinisi iloga i Samoa.
O le saunoaga a Maualaivao Patelesio Pat Ah Him, na mafua lenei mataupu, ona ua taofia ma lē faataunuuina se tagi sa ia faauluina atu e faasaga i se tasi foi o tamalii o le latou lava afioaga, o Maualaivao Seiuli Pepe o lē o loo ia tauaveina le tofiga o le Sui Komesina o Sulufaiga.
O se fe’eseeseaiga sa tulai mai i totonu o fonotaga a le afioaga o Malie lea na mafua ai le tagi.
O le tagi a Maualaivao Patelesio Ah Him, e faapea ua aafia tele ona lagona ma tauleagaina lona tagata i le mātuiā o ni faamatalaga ma upu a Maualaivao Seiuli Pepe sa ia lalafoina i luma o le nuu i lea aso o le fonotaga.
Saunoa Maualaivao, e mafua lana tagi ona o le leai o ni moliaga na faia, ma le faamoloau o lana tagi sa faaulul i le ofisa o leoleoo.
Peitai, e tusa ai ma lipoti a lau Samoa Global News, sa molia e leoleo le afioga ia Maualaivao Seiuli Pepe poo le Sui Komesina o Sulufaiga, i le faaiuga o le tausaga 2021.
Faasilasilaga Taua / Important Notice
O Iulai 2022 sa lipotia ai foi e le Samoa Global News le tuuina mai o le faaiuga a le Faamasinoga Faavaomalo ina ua maea le iloiloga o le mataupu sa molia ai Maualaivao Seiuli Pepe i moliaga o e lua o le lafo o upu faalumaluma, ma le moliaga o le faia o ni upu tau faamata’u agai ia Maualaivao Patelesio Ah Him.
Sa faaleaogaina (dismiss) e le Faamasinoga moliaga uma e tolu sa tuua’ia ai Maualaivao Seiuli Pepe.
I le tolaulauina o le mataupu e le Alii Faamasino, le tofā ia Masinalupe Tusipa Masinalupe, na ia tā’ua ai, na fua le faaiuga a le faamasinoga i le tulaga ua lē ausia e le Itu Tagi poo le itu a leoleo manaomiaga taitasi o le soligatulafono, ae maise o le maualuga e aunoa ma se masalosaloga tatau (beyond reasonable doubt).
O le sa avea ma Palemia i tausaga e tele, Hon Tuilaepa Sailele Malielegaoi, o le sa avea ma Loia Sili, Savalenoa Mareva Betham, faapea ma lē sa avea ma Komesina o Leoleo, Fuiavailili Egon Keil, faapea ma lē sa avea ma Minisita o le Matagaluega o Leoleo, le afioga ia Sala Fata Pinati – o nisi nei o loo aafia uma i lenei tagi.
O loo tālia nei se aso e fofogaina ai lenei mataupu i luma o le Faamasinoga.
Job Vacancies
