O se aso e ese lava foi mo nai fanau o lo’o tausia i le Apitaga o le Fa’amoemoe a le To’omaga Mo E Puapuagatia (SVSG), ina ua asiasi atu iai le kalapu ua fa’aigoaina o le “No Cash” i le taeao o le Aso Toanai ua mavae atu nei.
O le kalapu a le No Cash lea ua faamautu nei se latou faigapaaga ma le SVSG, e faia i latou ma se aiga e tasi, latou te puipuia le fanau aemaise le galuega fita e feagai ma le Peresetene o le Apitaga ia Siliniu Lina Chang.
E le gata i lea, ae o le a faia foi le No Cash ma nisi e momoli atu le feau tāua i ē o loo faia pea sauaga mataga i le fanau, e taofi nei loa.
Saunoa Suliniu, e tele taimi e manaomia ai e i latou se fesoasoani, ae maise lava o le iai o nisi e mafai ona fa’alauiloa le feau taua, e taofi nei loa sauaga i totonu o aiga, ae maise o le aafia ai tele o le fanau.
“O le mea sili o lea ua iai nisi e mafai ona avatu se lapatiaga i ē o loo faia pea nei sauaga mataga i le fanau, e taofi nei loa;
“Ou te faafetaia lenei galuega alofa ua ofoina mai e le kalapu o le No Cash. O leisi itu taua o lea ua faamauina uma numera o telefoni o sui uma o le kalapu, e mafai ona matou valaaau iai i soo se taimi.
Saunoa le Peresetene a le No Cash ia Albert To’omata e faapea ua ese foi lagona ua oo ia i latou, ma ua latou malamala foi i le galuega a le SVSG o loo faia mo le puipuia lelei o le fanau.
O le agaga foi lea o le Sui Peresetene ia Sului Fata ma lona maofa i galuega o loo feagai ma le Peresetene o le To’omaga ia Siliniu, aemaise o le aufaigaluega i le tausiga o nai fanau.
“O lea ua fai tatou o se aiga e tasi, e lē toe pai se isi ia outou pe toe aafia se isi o outou”.
Na ia ta’ua, o le isi loa asiasiga i fanau nei o le a faia ai se latou BBQ ma ni ta’aloga e fa’afiafia ai pea nai nei tamaiti.
Sa tā’ua foi e le teutupe o lenei kalapu ma o se alii oti ulu ia Ivan Roebeck, e mafai ona latou omai foi i se aso pe a toe asiasi mai, e ‘oti fua ulu o tamaiti.
O le molimau a Siliniu Lina Chang, e moomia tele e i latou nisi e lagolagoina i soo se auala le faatinoina o lenei galuega fitā.
“O le tulaga maoae o lenei kalapu, o le toatele o tamā ma alii talavou o loo iai, ma e manaomia tele e le matou galuega le galulue faatasi ma le itupa o tamā.
Sa saunoa se tasi o Sui o le “No Cash” ia Ma’anaima Faimalo Scanlan e fa’apea, sa oo mai lava o le fia mafuta e faafiafia le fanau mo le aso fa’apitoa o le Halloween e pei ona fa’asalalauina. Sa latou asiasi i nai fanau nei ma ni lole, keke, aisakulimi aemaise o se tinoitupe e $1000 tala e pei ona o latou foaiina.
E lua itula o le polokalame sa fai ai siva ma pesepesega a le fanau o le Apitaga faapea foi le fanau a le No Cash sa faatasi ai.
Sa saunoa Maanaima, “Ua lagona lava lo matou fa’agae’etia ua mafai ona o’o mai i lenei nofoaga. Na matou aumaia ai ma a matou fanau e mafuta ma le fanau nei, ma ofoina atu ni meaalofa mo latou”.
“Ua lagona foi lo matou o’otia e ala i pesepesega ma fa’afiafiaga a nai fanau”.
Na momoli le agaga o le fa’afetai e le afioga i le Peresetene o le To’omaga ia Siliniu Lina Chang e fa’afetaia ai le No Cash ma ia fa’aalia ai fa’ato’a iloa lava lea ua patipatia e le fanau o le Apitaga o le Fa’amoemoe ia le fa’amanatuina o lenei aso ua fa’aigoaina o le Halloween.
Sa ia faafetaia le agalelei ma le ma’au fa’aaloalo a le No Cash, faapea a latou aiga ma fanau sa auai uma i lea taeao.
O le To’omaga Mo e Puapuagatia o lo’o tausia ai fanau sauaina e latalata i le 100 ma o le to’atele o nei teineiti laiti, sa sauaina i ni amioga mataga e faia e latou lava aiga. E Silia foi ma le 10 pepe o loo tausia e le Toomaga i le taimi nei.
