Talosagaina e le Loia se Suesuega Faafomai Faapitoa mo Aafiaga o le Mafaufau a Papalii Sia Figiel

0
500

Na tulai i le Faamasinoga Maualuga mo le uluai taimi le tamaitai tusi solo ma tala fatu ia Papalii Sia Figiel, 57, lea o loo molia i le fasioti tagata faamoemoeina.

O lē ua maliu o Polofesa Caroline Sinavaiana-Gabbar lea sa maua atu e leoleo i le GaluMoana Theater i  Vaivase-uta i le taeao o le Aso Sa 26 Me 2024. O Dr Caroline Sinavaiana-Gabbard, 78, o se uluai tagatanuu Samoa lea ma faauu o se Polofesa mai se iunivesete i Amerika.

Now available at our stores in Togafuafua and Salelologa.

Sa talosaga le afioga i le loia ia Unasa Iuni Sapolu o loo tula’i mo Papalii, e faapea o loo iai aafiaga o le mafaufau a lē ua molia, ma e tatau ona faatino se suesuega faafomai faapitoa e faamautu ai lea tulaga.

Sa talosagaina fo’i e Unasa le tapu ona faasalalauina faamatalaga e agai tonu i ni gaioiga sa faatino ai lenei solitulafono matautia, ona o atugaluga a le loia, e ono aafia ai le maua o se avanoa o lē ua molia mo se iloiloga e lē mamafa pito tasi ai le sailia o le amiotonu.

Ona o nei talosaga sa fofogaina tuu gutu atu (verbal submissions) i luma o le Faamasinoga, lea sa saunoa ai le alii faamasino le afioga ia Fepuleai Ameperosa Roma, e le mafai ona iloiloina e le Faamasinoga ni talosaga lë tusitusia.

I le itu a leoleo sa latou faailoa i luma o le faamasinoga se avanoa sei faamautu mai ai moliaga a leoleo.

Ua toe faatulaga e le faamasinoga le Aso 17 o le vaiaso fou e toe fofogaina ai lenei mataupu, sei tuuina atu le avanoa i le itu a leoleo e faamautu mai ai latou moliaga, ae o se avanoa foi mo le afioga ia Unasa Sapolu e tuuina atu ai talosaga tusitusia i luma o le faamasinoga.

O Papalii Sia Cathrine Figiel o se tusitala, fatu solo lauiloa, ua iloga foi lana tautua sa ia mauaina ai nisi o faailoga taualoa i tausaga ua tuanai.

moliaga faasaga ia Papalii e aofia ai ma le uumia o aupega matautia, ona o se samala ma se tama’i naifi o loo masalomia sa ia fa’aogaina, i uluai suesuega a leoleo.

O Papalii Sia Figiel, o se tasi ua lauiloa foi lana tautua, sa manumalo i se faailoga i le 1994, o le tauvaga ua faaigoaina o le Polynesian Literacy Competition, i lana solo, “Where we once belonged”.

I le 1997 na manumalo ai foi i se faailoga taualoa mai le South East Asia / South Pacific Region Competition Writer.

O ana tusi ua faaliliuina i le gagana Farani, faapea Siamani, ma isi gagana e tele o le lalolagi.

O loo taofia pea Papalii i lalo o le vaavaaiga a leoleo, e talia ai le toe valaauina o lana mataupu i le vaiaso fou.