Talosagaina le faia o se Taotoga Faapitoa i le tino maliu o Polofesa Caroline Sinavaiana-Gabbard

O loo taofia e leoleo se tama'i naifi ma se samala o loo masalomia na fa'aaoga e Papalii e faatino ai lenei gaioiga matautia ma fano ai le soifua o Dr Caroline Sinavaiana-Gabbard. 

0
3
Papalii is charged with the horrific murder of Dr Caroline Sinavaiana-Gabbard.

Ua poloai le Pule o Maliu Lilo, le Faamasino ia Papalii Rosella Viane Alalatoa, e faia se taotoga faapitoa mo le tino maliu o Polofesa Caroline Sinavaiana-Gabbar lea sa maua atu e leoleo i le GaluMoana Theater i  Vaivase-uta.

O lenei faalavelave o loo molia ai i le fasioti tagata faamoemoeina Papalii Sia Figiel. O ia e ona le nofoaga o le GaluMoana, ma o sē tasi ua lauiloa ma ia ausiaina faailoga taualoa i le fatu solo ma tusigatala.

Dr Caroline Sinavaiana-Gabbard and Papalii Sia Figiel.

Saunoa le Komesina o le Matagaluega o Leoleo, le tofa ia Auapaau Logoitino Filipo, e lē o mautinoa le mafuaaga poo se faamoemoega (motive) o lenei faalavelave, ae ua alagatatau fo’i ona faia se taotoga faapitoa e tusa ai ma le poloaiga a le Faamasinoga.

Saunoa Auapaau, “O le a lē mafai ona faamatu’u atu le tino maliu o le tamaita’i i lona aiga mo ona toe sauniga, seia ma’ea ona faia se taotoga faapitoa e sailia ai le mafuaaga tonu o lona maliu, e pei ona poloaiina e le Pule o Maliu Lilo.”

O loo taofia e leoleo se tama’i naifi ma se samala o loo masalomia na fa’aaoga e Papalii e faatino ai lenei gaioiga, ma fano ai le soifua o Dr Caroline Sinavaiana-Gabbard.

O loo fa’aauau pea ona taofia Papalii Sia Figiel i lalo o vaavaaiga a leoleo.

O le vaiaso fou o le a tulai ai i luma o le Faamasinoga Maualuga e tali atu i ona moliaga o le fasioti tagata faamoemoeina, ma le uumia o se aupega matautia.

O Dr Caroline, 78 tausaga le matua, na fanau o ia i Utulei, Amerika Samoa i le 1946.

O ia o le uluai tagatanuu Samoa na tofiaina e fai ma Polofesa o se Iunivesite i Amerika. O se tasi sa lauiloa i mataupu tau aoaoga ae o ia fo’i o se fatu solo.

O le tausaga 2016 na malolo litaea mai ai o ia ma taliu mai ai i Samoa e aumau ai.

O le Aso Toanai 25 Me o loo masalomia na tupu ai le faalavelave ae o le Aso Sa 26 Me na maua atu ai lona tino maliu i Vaivase-uta.

I mua’i suesuega a leoleo, na sola Papalii i le fale o sana uo ina ua tupu le faalavelave, ma moe ai i le po o le Aso Toanai, ae faatoa faamatala le mea ua tupu i le taeao na sosoo ai, ma agai mai ai i le Ofisa o Leoleo.