“E faagalo gata Siaosi i ona uiga alofa ma le tausi matua”

0
12587

Ua faasoa mai le tinā o Siaosi Faamoana i le faigata tele ona talia le ta’u mai ua maliu si ana tama, ao toesea atu mai aiga e su’e lumana’i ai i galuega faavaitaimi.

O Siaosi Faamoana mai Poutasi Falealili, ma Taitai Faasiusiu Manu mai Lotofaga Safata na maliliu i lā’ua i se faalavelave tau taavale i Ausetalia, ina ua tifa i tua mai le auala se minivan sa latou malaga ai. Sa maliliu i laua e toalua, ae faamanualia le isi toaiva o le pasese.

Sa faasoa mai le tinā ia Vaotuli Seaalii Aliasa ma le maligi o ona loimata i le faigata o le mafutaga ua motusia faafuasei.

“E faagalo gata Siaosi i ona uiga e ese le tausi matua.. E tali mai lava Siaosi i soo se mea ou te manao iai..”

“Talofa e i si a’u tama.. e le mafai ona faagalo.”

Saunoa le tinā, ua tele manuia o si o latou aiga, talu ona agai atu Siaosi i lana galuega faavaitaimi i Ausetalia.

“E sola si a’u tama ua tele mea aoga a Siaosi ma ua mautū foi le matou aiga. Ua maea ona fai le matou fale, ma o lana meaalofa mulimuli lava mo a’u, o le taavale.”

Saunoa le tinā o Siaosi e ese le tali mana’o.

“O mea uma e faimai lava lana tala, o mea ia e pule ai oe. Sa ou fai fo’i iai i sa’u sefe, na faatau lava..”

“E tali mai lava Siaosi i soo se mea ou te fau atu iai, talofa e i si au tama, e le mafai ona faagalo.”

E le gata i le tinā, ae ua motusia ai fo’i le mafutaga mafana a Siaosi ma si ona toalua ia Tafaoata. O loo tuuina mai i luga o upega tafailagi si a la talanoaga mulimuli i le po o le Aso Sa, ae lei tula’i mai le faalavelave i le Aso Gafua.

Siaosi Faamoana ma le faletua ia Tafaoata.

O le faalua lea o malaga a Siaosi i Ausetalia. I isi tausaga ua mavae, sa malaga ai fo’i o ia i galuega faavaitaimi i Niu Sila i lalo lava o le polokalame a le Falealili Seasonal Worker Programme lea sa faailoga le 20 tausaga o lea auaunaga tāua i le Aso Faraile na te’a nei.

E le’i mautu mai se polokalame ma ni fuafuaga mo le toe faafoi mai o tino maliu o Siaosi Faamoana ma Taitai Faasiusiu Manu.

Faasalalauga Taua