“O se faanoanoaga tele ia te a’u le talosaga a loia e tolopo i le tausaga fou le faamasinoga”

"Dad ua toe tolo foi le faamasinoga, ae faafefea ea matou, ua ta fia mapu mai lava i nei faamatalaga e lalau mai."

0
3840

“O se faanoanoaga tele ia te au le talosaga a loia e tolo atu i le tausaga fou le faamasinoga.. ae o fea le faimai e fai le amiotonu?”

Sa faailoa le finagalo faanoanoa a le Faipule o Faleata 4, o ia foi o le Failautusi o le Vaega Faaupufai e Puipuia Aia Tatau a Tagata, le afioga ia Lealailepule Rimoni Aiafi i se faatalanoaga ma tusitala i le vaiaso nei.

Agai ane loa i lau SOS I Togafuafua poo Salelologa.

Sa saunoa Lealailepule i le tele o aafiaga o ia ma lona aiga, ae maise o lana fanau, i le umi o lenei mataupu o loo tuuaia ai pea ia e ala mai se molimau a Samuelu Fauena Su’a, i le fasioti tagata.

“O se faanoanoaga tele ia te a’u, ona e le na o a’u o loo aafia i le mataupu nei”.

“O lea na tou faimai tatou te ō i le faamasinoga, ae aisea ua toe talosaga ai e tolo i le tausaga fou..?”

“Ua umi tele ona toso pea lenei mataupu ma aafia ai lo matou aiga emaise si a’u fanau i faamatalaga e lalafo mai ma tuuaiga.. ae faapena foi le aiga o si atalii lea na maliu i le faalavelave..

“Leai. Omai tatou o i le faamasinoga se’i saili le amiotonu..”

Saunoa Lealailepule, o ia na faateia i le faimai o lona afafine, “Dad o lea foi o le a toe toso foi lenei mataupu, ae faafefea  matou? faafefea oe? o lea lava e lalau mai lou fasioti tagata i aso uma.. ua ta fia mapu mai lava i nei faamatalaga e lalau mai.”

O le itu lena na mafua ai se feiloaiga a le faipule ma le vasega o tusitala, i se fia talosagaina o le faamasinoga ma se tuualalo, e alofagia se’i ave le faamuamua i le mataupu ae se’i saili le amiotonu.

Saunoa Lealailepule, sa tuuina atu se fautuaga a le Sui Palemia i le Ofisa o le Loia Sili, se’i tuuina atu le faamuamua i lenei mataupu, ona ua toatele naua ē o loo aafia.

Ua faailoa fo’i e Lealailepule, e 80 molimau o lenei mataupu, ae afai e umi ona tolo.. e lē o moe le fili.. ma e ono avea ma tulaga e tula’i mai ai nisi faiga taufaasese, togi tupe poo le faamatau fo’i i molimau.”

O se agaga fo’i lea sa faaalia e le Loia mo le Ofisa o le Loia Sili (Prosecution)  ia Taimalelagi Leinafo Strickland, ina ua fofogaina le mataupu i luma o lana afioga i le Faamasino Sinia o le Faamasinoga Faaitumalo ia Talasa Atoa-Saaga.

O le amataga o le vaiaso na talosaga ai loia a Samuelu e fia tolopo le mataupu i le tausaga 2025 ona ua le avanoa mai le loia KC mai Niu Sila.

O le mataupu lenei o loo i luma o le faamasinoga, e mafua mai le molimau a Samuelu Fauena Su’a, e faapea o ia sa iai i le taimi na lavea ai Ituau Maletino, o se tamaitiiti 18 tausaga mai Vaitele Fou, Falelatai ma Fasitoo. O le molimau a Samuelu e faapea o Lealailepule na faafoeina le taavale na tupu ai le faalavelave.

O lenei mataupu e pei ona alu nei le 3 tausaga o loo vevesi pea i luga o upega tafa’ilagi, o loo aofia ai moliaga o le tuuina atu o faamatalaga sese i se suesuega a leoleo, faapea ma le lafoina o upu matuia ma le tuuina atu o molimau sese ua aveseseina ai se suesuega a leoleo (conspiracy to defeat the cause of justice, conspiracy to commit an offence, issuing insulting words, harassment, fabrication of information and giving misleading information to the police).

E 104 moliaga o loo faasaga ia Samuelu Su’a ae 59 moliaga a lona toalua ia Sivai.

O le faipule ia Fepulea’i Fa’asavalu Su’a e 18 moliaga, ae o le alii leoleo ia Li’o Fa’ataumalama Auava e 9, ma Lisemarie Schmidt e 4 ona moliaga.

Sa toe valaai le mataupu i le Aso Faraile 24 Me 2024, ma toe faatulagaina ai le Aso Tofi o le vaiaso fou 30 Me 2024 mo se fetuunaiga o se aso e suesueina ai ma amata valaauina ai molimau.

Sa valaau fo’i le mataupu i le talosaga toe iloilo a Samuelu ma Sivai e tatala i laua i tua (bail applications) i le Faamasinoga Maualuga. Sa taliaina ai e le Faamasinoga Maualuga le tatala i tua o le faletua ia Sivai Kepi, ae o le vaiaso fou o le a tuuina mai ai se tali mo le talosaga a Samuelu