Talosaga loia a Samuelu ma Isi e Tolopo i le Tausaga Fou le Suesueina o le latou Mataupu

0
2163

Sa faatumulia le fale faamasino i Mulinuu ina ua toe valaau le mataupu a Samuelu Su’a ma Sivai Kepi, faapea le faipule iā Fepuleai Fa’asavalu Su’a, ma le alii leoleo ia Li’o Fa’ataumalama Auava ma Lisemarie Schmidt.

Ua talosagaina e loia a ē ua molia – ina ia tolopoina atu le valaauina o lenei mataupu i le tausaga fou 2025.

Sa fofogaina le talosaga i luma o lana aafioga ia Talasa Atoa-Saaga i le Faamasinoga Faaitumalo ao sauni atu le suesueina o le mataupu e pei ona faatulagaina mo le vaiaso nei.

O lenei mataupu e pei ona vevesi ai luga o upega tafa’ilagi, o loo aofia ai moliaga o le tuuina atu o faamatalaga sese i se suesuega a leoleo, faapea ma le lafoina o upu matuia ma le tuuina atu o molimau sese ua aveseseina ai se suesuega a leoleo (conspiracy to defeat the cause of justice, conspiracy to commit an offence, issuing insulting words, harassment, fabrication of information and giving misleading information to the police).

O le mafuaaga mo le talosaga toe tolopo, o le leai o se avanoa a loia o loo tauaveina lenei mataupu, ae maise o loia faapitoa KC (Kings Counsel) e toalua.

E pei ona fofogaina i totonu o le potu faamasino; “Ua leai se avanoa mo lenei tausaga mo loia o loo tauaveina le mataupu, aemaise o loia mai Niu Sila..

“E faatoa avanoa ia Mati ma Aperila o le tausaga 2025.. ”

O le isi mafuaaga na tuuina atu i luma o le faamasinoga, o le moomia lea ona faaliliuina i le faaperetania o tala poo faamaumauga (evidence) mo le faafaigofieina o tapenaga a loia o loo tulai mo e ua molia.

Fesootai Tualoina Sara Brunt mo nisi faamatalaga.

Sa faailoa e le tamaitai loia ia Tamalelagi Leinafo Strickland o loo tulai mo le Ofisa o le Loia Sili, e toa 80 molimau ae ua maea ona faaliliuina i le gagana faaperetania le 70 lea ua ma’ea ona tapenaina atu e le itu a leoleo.

Sa faailoa fo’i se popolega a le tamaitai loia ia Taimalelagi, ona o aafiaga i ē o loo tapena mai e fai ma molimau i lenei mataupu. Ua tele nāua le faasea ma upu taufaamatau o loo aafia ai fo’i ē o loo molia, faapea ma le itu a leoleo.

O se manatu a le tamaitai loia, o mafuaaga tāua nei e lē tatau ai ona toe tolopoina le mataupu.

Sa faamanatu mai e le afioga i le faamasino ia Talasa Atoa-Saaga, sa latou soalaupule lelei lava ma loia, ma latou malilie faatasi mo le vaiaso nei e suesueina ai le mataupu ma fofogaina ai molimau.

Peitai, o lea ua oo i le aso atofaina ae toe aumai le talosaga tolopo.

Saunoa le Faamasino e tatau lava ona faataunuu i le tausaga nei ma taumafai e tuu atu nisi aso ia Iuni, Iulai, Aokuso ma Novema. Peitai, na tali mai loia uma nei, ua iai a latou mataupu ua maea ona faavasegaina mo ia masina.

E toe fofogaina la le mataupu a Samuelu ma isi i le asō, Aso Faraile 23 Me 2024, ina ia faamaumaututu ma faatulaga ai se aso o le a suesueina ai molimau.

Email: Erika retzlafftravel@ipasifika.net mo pasese e te malaga mai ai i Samoa nei!

E 104 moliaga o loo faasaga ia Samuelu ae 59 lona toalua ia Sivai. O le faipule ia Fepulea’i e 18, ae o le alii leoleo ia Li’o e 9, ma Lisemarie e 4 moliaga.

O le afioga ia Unasa Iuni Sapolu o loo tulai mo Samuelu ma Sivai, o Muriel Lui o loo tulai mo le sa avea ma Minisita Lagolago iā Fepuleai Su’a ma Lisemarie Schmidt, ae o Tanya Toailoa o loo tulai mo Li’o Faataumalama Auava.

O loia faapitoa mai fafo o loo faatupeina mai e nisi o le mamalu o le atunuu o loo lagolagoina le faigamalo poo FAST Supporters o loo alala i atunuu i fafo e pei ona faasalalauina mai i luga o upega tafailagi.