23 Oketopa 2020, Apia Samoa. E toa luaselau suafa sa aloaia ona resitalaina mo le faamoemoe e tauva mo le faiga Palota Tele a le atunuu i le aso 9 o Aperila o le tausaga fou, ina ua tapunia le lola I le asõ.
I le 200 o nei sui tauva sa resitalaina e nao le 23 sui tamaitai ua mafai ona faamaoniaina o le a tauva i le palota o le tausaga fou.
O le 114 o i latou o loo resitalaina i lalo o le vaega faaupufai a le HRPP.
O le vaega faaupufai a le FAST e 50 a latou sui na resitala. O isi vaega faaupufai e pei o le Tautua Samoa e 14 a latou sui, Sovereign Independent Samoa e toatasi, Sui Taitoatasi e 15 ma le Samoa First e toaono a latou sui.
Faailoa mai e le Ofisa o Faiga Palota e ala i se faasilasilaga faalauaitele e faapea, e tolu itumalo faapalota e na o le taitoasi o latou sui tauva e aofia ai le Itumalo o Faleata 3 lea e na o le afioga ia Lealailepule Rimoni Aiafi ma le Itumalo o Sagaga Numera 1 e na o le Afioga ia Loau Keneti Sio sui tauva na mafai ona resitala mai ai.
Sa taua e se tasi sui o le FAST, le Afioga ia Faumuina Leatinuu Wayne Fong, e iai le latou sui tauva sa fia resitalaina mo nei Itumalo. “O Paloa Louis Stowers lea e musu le Pulenuu a Vaitele e sauni, faapea ma Panoa Tavita Moala mo Faleula..”.
Ua faamaonia mai foi e le FAST, e toatolu a latou Sui Tauva o le a finauina i le Faamasinoga le lē sainia o latou Pepa e Sui o Nuu. O Fata Meafou mai Afega le isi sui sa faamoemoe e tauva, ae lei mafai ona saini ana pepa.
O le itumalo o Lotofaga e na o le Afioga i le Sao Faapito ia Fiame Naomi Mataafa le sui tauva.
O le itumalo a le afioga i le Alii Palemia o Lepa, e toatolu ia te ia tagata o le a tauva e aofia ai Faletagoai Tausaga ma Tuula Kiliri Lafi Tuitui.
O se taimi muamua lenei o le a tauvaina ai le sui o Lepa talu mai ni faigapalota se tele ua tuanai.
