(OFISA SOOUPU) Na toe faamanino e le Palemia Afioga Tuilaepa Dr. Sailele Malielegao, nisi o mafuaaga taua na mafua ai ona manatu le Malo e faatuina le Faalapotopotoga o Faaputugatupe Teufaafaigaluega o Mavaega Tausi a Samoa (UTOS)
E pei ona silafia o loo i ai lava nisi o loo faalia o latou finagalo aemaise o le le malamalama i le taua o le auaunaga a lenei foi faaalapotopotoga ma mafuaaga na faatuina ai e le Malo.
Na saunoa Tuilaepa e faapea; “O le faalapotopotoga lea na ala ona faatu ona o le matau toto’a a le Malo i le taimi ua tuanai faasolo mai lea i le tausaga e 1970 agai mai i le 1980. O le sefulu tausaga lea sa i ai mea foi ia o nonogatupe mo le atina’e, masalo e te manatua, sa faasalalau o e fia fai ni a latou teugatupe teu mai i atina’e ia a le tatou Malo ae maualuga la le tului, e ta’u mai a foi pe lima tausaga e aumai ai toe totogi,.”
“O a’u la sa nafa ma le vaega lea a o o’u i ai i totonu o le Matagaluega o Tupe, ae sa matauina ai la i le taimi lena, se o le toatele o le taotu atunuu e fia o mai e teu a latou teugatupe i i, e feololo atu le tului e maua nai lo le o e teu i faletupe e laititi.
“O le na pei e tupu ae pea le manatu i le Malo, e lelei ona manatunatu loloto pea i ai i le itu lea, ae te’i loa ua agai malo o le lalolagi aofia ai foi ma tatou i le mea lea o le faamatuu atu i tua o tele o pisinisi foi ia e fai e le Malo e gau; E le na’o Samoa ona o le tulaga lava lea i manatu o tagata lautele, se o mea faitele, e alu le tagata ia e vaai lana mea aoga, ia ma gau ai a le faalapotopotoga.”
Ae i le faamatuu ai i tua o pisinisi a le Malo na saunoa Tuilaepa e faapea; “O le mea la lena na tupu a’e ai le manatu i le Malo, o lea o le a faamatuu faamatuu faamatuu atu i tua i’u a’e ina ave uma e i latou mai fafo; mo sina faataitaiga, o le faletupe o Samoa i Sisifo lea na faatauofo i tua ae malo ai le ANZ, ia lea la ua sau loa le ANZ faagaioi, ua leai a la se tatou sea o loo i ai ia poo ni sea foi a nisi tagata o le atunuu.
“E i ai la le naunautaiga o le Malo i le mãtau atu i mea ia e tuu i tua, o nisi o tatou tagata ia o tagata foi e maua tupe, ae faapefea le lautele, fai se faiga foi lele ina ia tau faasoasoa atu ai le oloa i tagata lautele ae le o le faaputuputu pea i lima o le au mau oloa o le a atili ai a ona mau oloa atili.”
“O lea la na faatu ai le mea lea, ae faatu tonu a i le taimi o le a faamatuu ai i tua le tatou Samoa Tel, i le talitonuga o a’u ma le Kapeneta i lena taimi o le matuã tele o le oa a le Samoa Tel, ae o polokalame a le malo faamatuu i tua, ona e le tutusa a le mea e fai e le Malo, e alu alu alu gapa, ae a tuu i tua e tele.”
“O le mea la lea e sa’o tele a lena manatu, ia na ona tuu atu a i tua malo ai loa le Bluesky, ia ua e vaai la i ai i le alu a le Bluesky lea e i ai, ia toe faasalalau le isi sau le Digicel ia lea la ua fai ai le laua tauvaga ae manuia ai tagata tatou i le vave o fesuiaiga o telefoni ma taugofie telefoni nai lo le kamupani foi lele a Niu Sila lea na i ai o le Telecom e oo atu i talatu o Moataa ua pepe, ia omai loa tama ia soo se mea a e te oo i ai, poo tuã i Lepa e telefoni atu a alu i Rusia alu i Amerika i le taimi la lenei.”
“Lea la na alai ona le ave uma e le Bluesky ia sea ae faatu loa ma le vaega la lea, lea la ua mafai ai e tatou tagata lea e teu a latou tupe ona faapea atu o lea la e umia e latou ia isi sea o le Bluesky, e le faapea la o umia uma e papalagi o lea foi e i ai ia tatou tagata o lea e umia a latou sea i totonu ae auala mai i le faalapotopotoga lea.”
“O lona uiga la o se faiga pito sili lea ona taua e taofiofia ai nisi o le tamaoaiga o kamupani nei e umia e o tatou tagata ae auala atu i latou teugatupe i totonu o faalapotopotoga ia. Ae a alu atu foi la ia tului e tetele atu tului nai lo le ave o au tupe e teu i le faletupe ia mai fafo.”
“O le ‘au’au atoa a lena na fai ai ia le faalapotopotoga lea, ia ma e o lea a ou te iloa e taumafai foi a ia le au taufaasese e aumai ia ituaiga manatu vaivai e faaleagaina ai le taua o le tautua o loo fai foi e le faalapotopotoga lea.”
(9)
