(OFISA OLE SO’OUPU): Ua maitauina e le Malo nisi o tamaiti Samoa o e ua vaetamaina e tagata Samoa o loʻo nonofo i atunuu i fafo, o loo fa’aaoga e saili ai tupe mai le malo a o nisi ua faia o ni kavigi poʻo tagata faigaluega i totonu o latou aiga na vaetamaina i latou.
I lea tulaga, na faalia e le Palemia Afioga Tuilaepa Dr. Sailele Malielegaoi nisi o aiaiga mo le faafaigata ai o tulafono a Samoa, ina ia mautinoa ai e le toe faʻaaogaina nei fanau ua vaetama e o latou aiga Samoa i atunuu i fafo i tulaga faapea.
Na saunoa le Palemia ia Tuilaepa i se faaliga faalauaitele:
“O le tulafono e faatatau i le mataʻituina o le vaetamaina faavaomalo o fanau a Samoa lea o loo saili ai e matua mai atunuu i fafo tamaiti o le tatou atunuu e vaetama, e tatau ona talosaga mo se sitiseni Samoa e faamaonia ai o loo nofo i fafo, ae o loo mana’o e vaetama se fanau a Samoa”
“I lalo o le tatou tulafono o loo i ai nei, o loo faamalosia ai aiaiga o le tatau lea ona faatumu e matua mai atunuu i fafo le talosaga mo le vaetama o fanau a Samoa, a’o le’i faamaonia.”
“E aofia ai le siaki lele ma se Tusi Faamaonia mai le Loia Sili. E tatau ona latou maua uma pepa faamaonia, o loo aiaia ai le leai o se soligatulafono na aafia ai ma faailoa mai faamaumauga e iloa ai le mafai ona latou lagolagoina le tamaititi pe a fai ae vaetama.”
“E i ai nisi tagata Samoa o loo nonofo i fafo ua talosaga mai ina ia faafaigofie tulaga e manaomia, ona o loo ta’u latou o ni sitisene Samoa o loo nonofo i atunuu i fafo, e le’o nisi matua ese o nisi atunuu.”
“O le tulaga lena na ou faatonuina ai le Loia Sili e silasila i ai, ma fai ni teuteuga talafeagai i le tulafono ina ia mautinoa le saogalemu ma le soifua manuia o fanau a Samoa o le a vaetama mai faiga saua o loo fai i ai e i latou ua vaetama i ai.”
“Ua logoina a’u, o nisi o fanau a Samoa ua vaetama i atunuu i fafo o loʻo fa’aaoga o ni pologa i o latou aiga, ma o nei mea uma na faia i lalo o le a manuia olaga o fanau ae vaetama.”
“O se popolega tele lea i le Malo, i le alia’e mai o soligatulafono i le felaua’i faasolitulafono ai o tagata e fai ai isi soligatulafono”
“E tatau ona tatou mataala i mea ia, ma e amata atu i le puipuia o õ tatou lava tagata o le a vaetama e i latou o loo nonofo i fafo ”
(3)
