Tuuga Taavale

0
67

(OFISA SOOUPU) Na faalia e le Palemia Afioga Tuilaepa Dr. Sailele Malielegaoi le ave ai lea o le faamamafa a le Malo i le toe teuteuina o le tulafono o le ave taavale matautia i luga o le auala tele faatasi ai ma faasalaga o i latou e molia.

O loo maualuga i le Malo le saogalemu o le mamalu o le atunuu femalagai i luga o auala aemaise nisi e savalia tafaala i soo se taimi.

Saunoa tuilaepa e faapea; “Ua uma ona ave la’u faatonuga i le Ofisa o le Loia Sili, e toe faamamafa ma toe faamaai le tulafono e avatu nei e pasi e matuã tapu iã Samoa nei mea, aua ne’i toe faia nei mea valea faapenei.”

“A fia kukuu a le tagata i lana ia taavale ma fia fai ana faaliga, alu e fai i le latou aiga, ae aua aua aua nei sau fai i luga o le auala tele, o lea e feoa’i ai tagata ma savavali i tafãala, auã o le faiga a le vaega lea, e faaalu le latou taavale ia saoasaoa pei o mea ia o tuliga taavale ia tou te vaai i ai ona taofi tu tu loa la ia ae taavili, faataavili foi lele le taavale, e pei la e femitai ai i le tulaga lena foi lea o le taofi tu tu ae faataavili ma faataamilomilo foi lea le taavale pei o tuliga taavale a kuluku ma leoleo ia tou te vaai atu ai i tifaga.”

“O la la e manatu a latou e manaia le latou mea la e fai, ae a fai la ae alu ane le taavale lena so’a le poumoli, ona pepe uma ai a lea o moli a aiga, pe pe uma ai a le taulaga atoa ma le atunuu atoa. Ua e vaai la i ai i le le mamao o le vaai a lena faamasino, lea pe toe faalelei ane le mea lea ua fia afe tala le mea e alu ai i le faatinoina o tafaoga a le au milionea nei, aua e le faia e ni tagata matitiva mea ia, e fai e le au milionea mitavale.”

“E omai feoa’i solo, a’o lea e fai mai lena faamasino o se mea manaia i le matamata, a’o mea valea mitavale a le au milionea nei. Ae a taavili taavili taavili le taavale alu atu a lavea atu ai se fale o se aiga, leaga atu ai ma le auala tele a le Malo, ae a i ai ma ni tamaiti i ina e foeti uma a, e leai a ma se tamaititi e ola. Ia ai la e fiafia lena faamasino e tupu mea ia, o pea latou ia, o pea e fai a latou mea i latou tuãfale, ae aua le omai fai i le auala o lea e feoa’i ai le mamalu o le atunuu.

“O Niu Sila a fia fai ia ni mea faapea e i ai ma mo mea o malae faapitoa a latou, auã o tagata e maua tupe, o e fai ai i ina tou fia mautupe, o e fai ai i ina le tou femitai, o e fai ai i ina le tou mitavale. O e faatau ni tou eleele e fai ai tou amioga ae aua le o mai fai i le auala faitele a le mamalu o le atunuu.”

O se tasi o tulaga na faamamafa i le saunoaga a le Palemia o le i ai lea i leoleo o le malosiaga e faaleagaina ai le taavale o le a solia le tulafono.

“Ia ma o lea la ua aoga foi lau fesili i lea mataupu, o lea ua faalauiloa atu ai e fai pea e leoleo le latou galuega mo le puipuiga o le filemu. O a’u foi lea e fai ma ou valaau i leoleo, e vaavaai ia tuugataavale ia e molia uma i luma o le faamasinoga i luga o le ave taavale lemafaufau o mea na e faasa i lalo o le tulafono.”

“O le mea foi la lena e taua ai le avatu i tai i le faamasinoga, fai lelei mai le latou faaiuga ae le o le aumai o ni faamatalaga faavalevale faapea.”

“Aua e lelei le maimau o le minute e tasi o le ola nai lo le maimau o le ola i le minute e tasi, ma o le feau foi lea i le atunuu aemaise lava i matua, e lelei le fautua pea i fanau e tuu ia amioga nai lo le toe salamo ane ua leaoga.”