Sa tula’i i luma o le Faamasinoga Maualuga se tamaitiiti 14 tausaga lona matua, e tetee atu i ni moliaga o loo tuuaia ai lona faia o ni gaioiga mataga i se teinetiiti e i lalo mai o le 12 tausaga.
I faamaumauga a le itu a leoleo, o loo tā’ua ai, e iva tausaga o le teineitiiti o loo aafia i le taimi sa faatino ai le soligatulafono o loo i luma nei o le Faamasinoga.
Sa tulai le loia a lē ua molia, le afioga ia Aeau Tima Leavai e faailoa i luma o le Faamasinoga le tetee atu o le tamaitiiti i moliaga uma.
Ae o faamaumauga a le itu a leoleo, e faapea o lenei faafitauli sa lipotia mai i se tasi o afioaga i le motu tele o Salafai.
Na fofogaina lenei mataupu i luma o lana afioga ia Niava Mata Tuatagaloa i le taeao o le Aso Gafua.
Sa talia e lana afioga le talosaga mo se avanoa e tatala ai i tua lē o loo tuuaia. Sa tuuina mai nI aiaiga e aofia ai le saini i le ofisa o leoleo i Fagamalo ae lei taina le 4 i le afiafi.
Sa faatonuina foi e le Faamasinoga lĕ ua molia ina ia taumamao ese ma ni vaega o loo iai ni teineiti e i lalo o le 12 tausaga.
Ua faatulagaina mai e le Faamasinoga se aso o le tausaga fou e suesueina ai mau a le itu a leoleo, ae maise o le tuuina atu lea o le mataupu i le Faamasinoga mo Talavou (Youth Court) ona o tausaga (14) a lē o loo tuuaia.
I nei lava mataupu o sauaga tau feusuaiga e aafia ai teineitiiti i totonu o Samoa, o loo faasolo nei foi i luma o le Faamasinoga se mataupu sa aafia ai se teine 9 tausaga, o loo tuuaia sa faia iai ni amioga mataga a lona tama, faapea ma le grandfather a lona tama ma le uo a le toeaina.
E faatupulaia pea mataupu tau sauaga i tina ma tamaitai i totonu o Samoa, e pei ona famaaonia i se suesuega a le Ofisa o Sulufaiga i le tausaga 2018 – e silia ma le 80 pasene o tina e sauaina e latou taitoalua poo paaga vavalalata (intimate partners).
Ae mo sauaga tau feusuaiga, sa molimau le lata i le 10 pasene o i latou sa suesueina, sa faamalosi i latou (rape) e nisi lava o tamaloloa o latou lava aiga (someone known to them).
