E mafai ona tuu ese le mataupu a le Minisita o Galuega faasaga i ie sa fai ma Palemia o Samoa, pe afai e faatoese Tuilaepa ma toe ave i tua ni ana lafoga o loo tuuaia ai le Minisita o Galuega Tetele.
O se finagalo lea o Olo Fiti Vaai, i sana faatalanoaga i luga o le ala ata o le TV EFKS i le vaiaso nei.
Ta’ua e Olo, o sona ia lagona, e faigofie lava le lā mataupu ma Tuilaepa, pe afai e faatoese atu ma toe ave i tua upu na lafo o loo mafua ai le faaleagaina o le ta’u leleia o lona igoa (defamation).
“O loo iai le tofa i le susuga ia Tuilaepa, e faatoese ai i lo’u itumalo ma lou aiga, ona uma lea o le ma mataupu, ae a leai, ia lona uiga o le a faa’auau pea le ma mataupu i luma o le faamasinoga.”
Sa ta’ua foi e le Minisita, o le tamaitai loia ia Mauga Precious Chang, o lea ua tulai mo ia ao tapena atu se aso e valaauina ai le mataupu i luma o le faamasinoga.
Saunoa Olo, sa iai uma faamaumauga o lana mataupu i leoleo, peitai, na toe moomia foi e le Ofisa o le Loia Sili se update, ma o le lā ua ma’ea ona toe tapena mea uma.
“Ae ua tuuina atu vaega uma i le tamaitai loia ia Mauga Precious Chang, o ia lea o le a ia tau’aveina la’u mataupu.”
O lenei mataupu na tulai mai ia Setema i le tausaga talu ai, ona o se lafoga a Tuilaepa Sailele e uiga i se taavale a sa tuuina atu mo galuega a le Minisita, ae le o iai se tusi laisene e faailoa ai o se taavale a le Malo.
Sa ta’ua e Tuilaepa, o le leai o se laisene a le Malo i se taavale a se Matagaluega a le Malo, o se faiga faa gaoi lena tulaga pe afai o loo resitara le laisene i le suafa o se tasi.
O le tagi a Olo, o lenei lafoga ua aafia ai le tauleleiina o lona tagata, ae maise o le tofi Minisita o loo ia tauaveina.
