(OFISA SOOUPU) O le saunoaga lenei a le Palemia, Afioga Tuilaepa Dr. Sailele Maleilegaoi ina ua fesiligia i le polokalame a le TV1.
O se faamalosi ma se toe fafagu a le Malo i itutino o taaloga i le faaletonu ai pea o taumafaiga a ‘au taaalo a Samoa e masii i taaloga faavaomalo a le lalolagi, e le gata i lea e le’o toe mamao se taimi o totoe ae faataunuu taaloga a le Pasefika lea o loo talimalo ai Samoa i le 2019 ma e tatau lava ona tula’i mai i se taunuuga lelei tapenaga a ‘au uma a Samoa e tauva ai.
TV1
O lea ua toe taliu mai le aumalaga lea sa auai ai le Minisita o Aoga, Taaloga ma Aganuu ma le ‘au a Samoa i taaloga Olimipeka a Tupulaga i Argentina. A’o lea e foliga mai e le’i maua se tatou pine.
Tuilaepa
“Ia, auã foi o le fili a o le tama o le maua, ia lea ua maua i i.”
“Manatua foi le taeao sa o atu ai i le Palemene e aumai se faamanuiaga, ia na aumai a si faamanuiaga ma si tuma e tasi. E na’o le tasi si a’u tuma lea na aumai ai i le mea lea o le leva ona nonofo a’o lea faatoa aumai le latou talosaga. E atagia ai i inã mo le mea o le faakemekeme foi lele i le tapenaina o tama taaalo.”
“O le mea mo’i a o le mea lea e tatau ona latou faia, lavea uma ai a le vaega uma e tapenã ‘au; aumai faamatalaga i i le Kapeneta e ta’u mai ai; mo se faataitaiga, o le tama lea ua mafai ona ia sii ina le 70kg, o le pine auro poo le matãti’a lea e i ai e 75kg, a’o le ave o le tama ua oo lana sii i le 70kg, ae ta’u mai le matãti’a lea e maualuga e 120kg, ua matuã le tatau ona faia se faaiuga faapena.”
“O le uiga na o la’u faamatalaga, o lea la e tapã e le Kapeneta ia faalapotopotoga e tapenã ‘au, a’o le’i avea ‘au aumai matãti’a ua ausia e iloa ai pe tatau ona ave se ‘au.”
“O le mea na e oo mai nei a o lea a e tauanau e aumai, na selaulu a e le Matagaluega o Tupe, a’o le vaai foi lele i nai tamafanau, auã e le’o tama fanau lea e tupu ai le mea lea o latou o le pulega, o lona uiga o le fia tafafao vale le mea lea e fai.”
“O lea foi la sa fai ai la’u tala, ia ua fiasefulu tausaga o tatou o i le Olimipeka a’o le mea a lea e aumai e moomia a le ave o tama ia e maua le poto masani, ia omai e leai se mea, ia o; omai e leai se mea, a’o lea e sau a e moomia a le ave; ae a fesili atu; Se’i aumai ina ia le tamo’e lea e tamo’e ai le tama lea? Ia e leai a ma se mea e aumaia, auã o ina e maua ai le tatau ma le lế tatau.”
“O le tulaga lena o le ta talanoaga lea e fai nei, ae pei o le fetãla’i o le faaiuga a le Kapeneta e le’o toe mamao ia taaloga a le Pasefika, e tãua la le o se’i faata’ita’i i ai poo fea le tulaga ua i ai.”
“ A’o lea la ua o mai nei, Oh! O le matuã tala e tupu ai le fia moe le mea lea ua fo’i mai nei ma latou.”
(11)
