(OFISA SOOUPU) O loo faagaloso aulape e ao ona ausia e le Kamupani o le Samoa Airways’ mo se isi vaalele fou e tautuaina le mamalu o tagata femalagaa’i i luga o le ea.
I le taimi nei, e na’o le tasi le vaalele o le ituaiga o le Boeing 737-800 o loo faagaioi ai atina’e a le Kamupani e faamalie ai itutino uma o loo aiai ai le faatofãlaiga a le Malo ina ia toe faatuina lenei Kamupani a le atunuu.
I lea tulaga na saunoa faamalamala le Palemia, Afioga Tuilaepa Dr. Sailele Malielegaoi i le polokalame ma le ala ata faasalalau a le TV1e faapea; “o lea faatoa uma ona matou talanoa, o lea o loo faatalatalanoa, manatua foi o lea o le a tatala le isi alavaa lea i Pirisipeni, ia manatua foi e i ai isi alavaa i Melepone, Ueligitone o i Toga o la la e galulue i ai le komiti.”
“O lea foi la ua faatalanoa e i ai le vaa lea o loo mafai ona faaoga e tatou ona taunuu loa lea o le miti lena auã o le mea ia e tatau ona lua ni tatou vaa, a faaletonu mai le isi vaa a’o lea e i ai le isi vaa e faaauauina ia faigamalaga.”
Na ia saunoa faaopoopo foi e faapea; “o le mea tãua la o le tapena lelei o faamatalaga lena e aumai i le Kapeneta e fai ai loa se iuga a le Kapeneta, ia uma atu le lisi lea e i ai nei ia Mati i le tausaga fou, a’o lea ua tula’i mai le isi vaa e faaauauina. Pei la o le tulaga lena o le tãua ia o nei mea o le tatau a ona lua ni a tatou vaa.”
“Ma e ua ese foi le tulaga lea ua i ai nei ma le tulaga sa i ai le Polenisia, o le mea mo’i a ua toatele atu tagata faimalaga mai, e le gata o tatou a tagata a’o tagata asiasi mai fafo, o lona uiga la ua ese foi le tulaga lea ua i ai Samoa, o le tuai a ona lele le vaa a’o la ua i ai ia e e faaogaina ona ua tupu pea tagata faimalaga.”
O se itu taua tele lenei tulaga, aua o loo atagia ai le sologa lelei o taumafaiga a le ave fu’a a Samoa, aua le faamalieina o manaoga o le mamalu o tagata faimalaga i luga o le ea a o se manuia mo tagatanuu o Samoa uma.
(107)
