Sa maitauina le auai uma o Sui Sinia o le Matagaluega o Leoleo i toe sauniga o Muagutut’ia Punatau Aniterea Toloto Willie Tavita, lea sa māliliu ma isi sui savili (civilan) e toalua o le matagaluega i se faalavelave faafuasei tautaavale i Tiavi lata i Siumu.
O le Aso Toanai lea, aso 9 o Aperial sa faataunuuina ai toe sauniga paia o Muagutut’ia Aniterea, i le Ekalesia Katoliko Roma i Leauvaa. O Muagutut’ia e 42 tausaga o lona soifua.
Na ave’esea lona tino maliu mai le fale maliu o Sefo Pa’u i le Aso Faraile 8 o Aperila mo lona aiga i Leauvaa ma tofa ai mo leoleoga o le po.
I lea taimi ao tuu vaa atu i luga o le ala, na maitauina ai sui o le faauluuluga o le Matagaluega o Leoleo sa auai uma ai, e pei o le Sui Komesina ia Auapaau Logoitino Filipo, Sui Komesina Papalii Monalisa Keti, faapea le afioga i le Sui Komesina ia Leiataua Afamasaga Samuelu, o se tasi o Komesina Lagolago ia Papalii Efo ma nisi o le Matagaluega sa auai i le momoliina lea o se latou mea’alofa mo le ua maliu.
O le Sui Komesina le afioga Papalii Monalisa Keti, sa fai ma sui o le Matagaluega a Leoleo e fofogaina se latou molimau.
Saunoa Papalii, o Aniterea Toloto, ua atoa le 1 tausaga ma le 8 masina ma le 7 aso le latou mafutaga. O se taitai kamuta e faatuatuaina ma faamoemoeina e le Matagaluega o Leoleo. E tele galuega o ofisa o leoleo eseese i Savaii ma Upolu nei, sa galue ai mo le faaleleia ma toe lipeaina.
Ona o le faatuatuaina tele, sa ia maua ai le avanoa e aoaoina ai i le vaega e ta’ua o Leoleo Fesoasoani, e mafai ona faa’aogaina sui nei e avea ma leoleo i taimi ua manaomia tele ai e le Matagaluega Leoleo se fesoasoani.
Saunoa le Sui Komesina o Leoleo, o Muagutut’ia Aniterea sa iai le faatagaga na te aveina pe faafoe ai soo se tavale a le Matagaluega, i taimi o galuega moomia poo ni osofaiga foi a le Ofisa. O Aniterea foi, e maliu nei o loo taa’alo le au soka a leoleo i taamilosaga ma va ma isi matagaluega ma kamupani.
“O se tagata faamoemoeina tele ma faatuatuaina e le matagaluega.”
O se molimau foi lea a se Sui o le Ekalesia, o se tasi sa galue malosi i ona tiute faale’ekalesia.
Sa molimau le faletua ia Hana Lomitusi Tamapua, o si ona toalua sa faamoemoe iai le tausiga o le laua aiga, ma ua faigata tele ia te ia le mea ua tupu.
“O Aniterea, o ia lava lea faalagolago iai le tausia o si ma fanau, ae o lea e laiti tamaiti..”
“E faagalo gata, o se tagata e loto maualalo, ma e tali lava ia i le ata”.
I le talaaga o lona soifua, na fanau mai le aso 14 o Setema 1980.
Na soifua mai nai ona matua o Tavita Faasee (ua maliu) ma si ona tinā o Fa’atoa Sua.
E toafa ona uso, o Nikolao, Isaak, Misipope ma Michael, ae toalua ona tuafafine o Makerita Sam ma Fonotaga.
O Muagutut’ia Aniterea na aoaoina i le aoga tulaga lua i Leauvaa, faasolo atu ai i Sagaga ma le Kolisi i Leulumoega Fou ma agai atu ai i le aoga Ma’tata Eseese o Samoa mo le faakamuta. O loo ia umaiaina le laisene faakamuta e pei ona ia maua ai nisi o galuega tetele. E maliu o ia o loo galue i le Ekalesia Katoliko i Leauvaa, ae o se tasi foi o loo ia faafoeina le kalapu lakapi a le afioaga mo nisi o tausaga.
Ua tuua nei e Muagutut’ia Aniterea le mafutaga ma le faletua ia Hana, ma si a la fanau e toaono.
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
- “Ua Tatau Ona Ave Atoa Le Faamuamua ina ia Tafi Esea le Mala o le Sauaina lea o Tina, Tamaitai ma Tamaiti.” - November 29, 2023
