Toavalu le Fanau mai le Toomaga mo e Puapuagatia ua Faamanuiaina i Sikolasipi mo Niu Sila

"E tāua tele le iloa e le fanau o loo iai le isi laasaga mo le manuia o latou olaga."

0
647

E toavalu le fanau o loo tausia i le nofoaga o le Toomaga mo e Puapuagatia, ua faamanuiaina i ni avanoa sikolasipi i Niu Sila.

O Setema 2024 lea e faamoemoe e tuua ai e le fanau uma nei e toavalu le Campus of Hope mo Niu Sila e pei ona saunoa iai le Peresitene o le Toomaga mo e Puapuagatia, le afioga ia Siliniu Lina Chang.

“O le lagona faagaeetia ma le agaaga faafetai ona ua tali Le Atua i talosaga ma taumafaiga mo nisi faitotoa e matala mai mo le fanau..”

File Photo: President of SVSG Siliniu Lina Chang with SSAB CEO Tofilau Fiti Leung Wai

“O le naunautaiga ia aua nei muta ai ii avanoa mo olaga o fanau ua aafia i sauaga, ma ia aua foi nei iai se manatu ua leai so latou avanoa mo se lumanai.”

Saunoa Siliniu, e tāua tele le iloa e le fanau o loo iai le isi laasaga mo le manuia o latou olaga.

O fanau e toavalu ua faamanuiaina, o nisi sa aafia i faafitauli i totonu o aiga, ae o nisi ua silia ma le lua tausaga o latou mafuta, ma o ni fanau foi ua lava le latou mafutaga.

“O i latou uma nei, e finafinau ma ua matou matauina foi le ola tauivi.”

Tā’ua e Siliniu, e faigata foi ona momotu ese atu le fanau ona ua mafana le latou mafutaga, peitai, o le mea sili o le maua o se lumanai manuia mo latou.

O fanau o loo tausia ma faamautu i totonu o le nofoaga Campus of Hope i Tuanaimato, o loo faatino a latou aoga faapea fo’i ma taaloga mo i latou o loo iai le taleni i le itu tau taaloga.

Na faafetaia e le Peresitene le paaga ma i latou o loo lagolago atu i soo se vaega o loo tuuina atu ai le alofa tulai ma le aao mafola ma le agalelei i soo se itu, ae maise o fesoasoani uma e tuuina atu i le nofoaga o loo tausia ai fanau ua aafia i faafitauli tau sauaga i totonu o aiga.