Falepuipui le Ave Pasi sa Maliu ai se Tinā Maitaga

0
2486

Ua tuuina mai e le Faamasinoga Maualuga se faasalaga 4 tausaga mo se alii na ia faafoeina le pasi sa solomuli ma aafia ai se tinā sa maitaga, ma maliliu ai i laua ma lana pepe e le’i tuueseeseina.

O Fatu Manino Aiono, 27 tausaga mai le afioaga o Fasitoo Uta, sa faamaoniaina e le Faamasinoga, sa faasuaava i le taimi o le faalavelave, ma e le’i iai fo’i sona laisene ave taavale.

O le Aso 7 o Me 2021 na alu ai Fatu Aiono e piki le pasese o i latou sa agai atu i se bingo na faia i Faleasiu. Na taunuu e le’i mae’a le taaloga ona latou taumafa lea o le ava malosi ma nisi alii e faatalitali ai le tuua mai o le bingo a le pasese.

I faamaumauga a leoloe ma molimau, sa faaola e Fatu le pasi i le ma’ea mai o le bingo ma ia taumafai e liliu le pasi e agai mai i le itu sasa’e, peitai, na le mafai e Fatu ona faafoe le pasi.

Sa tifa i tua le pasi ma aafia atu ai ma nisi o taavale sa tutu pe paka i luma o se fale inisinia o loo tuaoi ane.

Sa tā’ua e molimau, sa oo atu lē e ona le fale inisinia ma valaau atu ia Fatu e tū mai lana pasi, ae se’i fai se tala i taavale tūtū ua lavevea.

E le’i tu lē ua molia, ae ua atili ai ona faafoe le pasi e sola ese mai lea nofoaga.

Sa faamauina e molimau, o le alu atu i luma o le pasi ae lavelavea mai ai i ni laau, sa toe vave faasolomuli mai ai i tua le pasi. Sa laga ese nisi o loo tuua mai i le bingo, peitai sa sulu le tinā maitaga ma solia ai e le pasi.

O Mariama Tula’imalo, 41 tausaga ma si ana pepe e le’i fanau mai o Laki LJ na faanatinati mai i le falema’i i Leulumoega ma faaauau atu ai i le falemai tele i Motootua, peitai, na maliliu uma i lā’ua ae le’i oo atu le taavale i Motootua, ona o le ogaoga o manuaga sa aafia ai.

Sa molia fo’i Fatu ona sa le’i tu i le taimi o le faalavelave pe oo ane fo’i e lipoti i le ofisa o leoleo le faalavelave ina ua tupu.

I le fofogaina o le faasalaga e le afioga i le Faamasino Sinia ia Vui Clarence Nelson, sa ia tā’ua ai, o le vaai a le Faamasinoga i le faalavelave na tupu, e fai si ogaoga tele.

“O le faamaonia o lou tagofia o le ava malosi, o le aafia ai o nisi taavale poo nisi o mea totino, e le’i mafai ona e tu i le taimi o le faalavelave pe lipoti fo’i le ofisa o leoleo, se maise ai o le maliu o le tinā, atoa ai ma le tagata fou o loo ia tauaveina, atoa ai ma lou tauaveina o le pasi e aunoa ma sou laisene mo le fa tausaga..”

“O itu uma ia e lē māmā ai le vaai a le faamasinoga.”

 

O le faasalaga o loo aiaia i le taiala a le Faamasinoga e sefulu tausaga le falepuipui (maximum sentence).

Saunoa Vui, “Sa talosaga le Ofisa o le Loia Sili o le fā tausaga ma le ono masina e talafeagai e amata mai ai se fua a le Faamasinoga,  peitai, i le vaai a le Faamasinoga e amata mai i le 5 tausaga.”

Sa toesea se vaega o le faasalaga i le ioeina o moliaga (guilty plea), ma o le taimi muamua lea faatoa molia ai lea alii i luma o le faamasinoga (first offender). Sa vaavaai fo’i le Faamasinoga i le ifoga ua mae’a ona faia, ona totoe mai ai lea o le 4 tausaga e nofo sala ai i le falepuipui.

Ua silia ma le 3 tausaga talu ona tula’i mai lenei faalavelave, lea ua lauina i le vaiaso nei le faasalaga a le ave pasi.

Faasalalauga Taua