E toatolu ni tamaloloa sa tulai i luma o le Faamasinoga Maualuga ina ua molia i tuuaiga ua latou faia ni uiga mataga i se teineititi e i lalo ifo o le 17 tausaga.
I faamaumauga a le Faamasinoga, e toatasi le taulealea e lata i le 30 ona tausaga, ae toalua ni tamā matutua – o le tama o le tama o le taulealea (grandfather) ma le isi foi toeaina matua, o se uo a le grandfather.
I faamaumauga a le itu a leoleo, o loo molia le taulealea i le mataifale (incest), ae o le tama matua ma lana uo o loo feagai ma moliaga o le faaoolima mataga (indecent assault) ma le faia o ni uiga mataga faasolitulafono (unlawful sexual connection).
O le mau a le itu a leoleo, o lē na aafia o se teineitiiti e iva tausaga lona matua i le taimi sa amata ai nei gaioiga. Ae o loo tuuaia sa faia e nei tamaloloa e toatolu nei gaioiga mai le 2010 e agai atu i le 2013.
O le masina o Me i le tausaga nei (2023) na faatoa oo atu ai lenei mataupu i le Ofisa o Leoleo, ma faatino ai loa suesuega a le Matagaluega.
O loo tetee e le tama matua ma lana uo nei moliaga, e tauala mai i la loia, o Tanya Toailoa ma Fetu Lagaaia.
Sa tatala ai foi i tua i laua i lalo o tuutuuga masani – ia tuuina atu pepa malaga, saini i vaiaso taitasi i le ofisa o leoleo i Faleata, ma aua nei taumafai e faafesootai lē na aafia, ma aua foi nei taumafai e faafesootai molimau o lenei mataupu.
O le taulealea o loo taofia pea, ona e lei maua se taimi e fesootai ai ma le loia o loo tulai mo ia. Sa tuuina atu e le faamasino, le afioga ia Niava Mata Tuatagaloa, le avanoa e feutaga’i ai ma lana loia, ona faatoa tuuina atu lea o sana tali i moliaga.
Ua faatulaga e le Faamasinoga le Aso 11 o Mati 2024 mo le suesueina o mau o lenei mataupu.
Public Notices
