Na tulai i luma o le Faamasinoga Maualuga se tamā ma se alii talavou o loo tuuaia i le aveesea faasolitulafono o nisi o aseta a le aoga La Amosa lea sa faatuina e le afioga ia Aiono Dr Fanaafi.
I taualumaga o le faamasinoga sa tā’ua ai na ulufale faamalosi i la’ua nei i totonu o le lotoa ma aveesea mai ai se moavao, kitara, sipika ma se uaea (extension). O nei oloa e tusa lona tau aofai ma le $4,550.
O Molesi Maiava, 49 tausaga, ma Lene Maiva, 25 tausaga, mai Vaitele Fou ma Tafaigata, o loo tuuaia i le aveesea o meatotino a le afioga ia Aiono.
Na ioeina e Lene Maiava le moliaga o le ulufale faamalosi e aunoa ma se faatagana faapea ma le gaoi, lea ua faatulaga ai e lana Afioga Niava Mata Tuatagaloa le Aso 13 Oketopa e fofogaina ai le faaiuga a le Faamasinoga.
Ae o loo teena e Molesi Maiava ona moliaga, ma ua faatulaga mai ai e le faamasinoga le Aso 4 Tesema o le tausaga nei, o le a fofogaina ai mau a le itu a leoleo.
Ua tatala i tua Molesi, i lalo o aiaiga e tuuina mai i totonu ona pepa malaga, saini i vaiaso taitasi i le ofisa o leoleo i Faleata, ma aua nei taumafai e faafesootai molimau o lenei mataupu.
Ua matauina pea le faatupulaia o soligatulafono o le gaoi ma le talepe fale i totonu o Samoa, ae maise o le aafia ai o tupulaga talavou i le itupa o alii.
From SGNs Online Public Notice Board
