Sa faali le lē fiafia o Faatonu o le Faamasinoga poo “Assessors” o Fanua ma Suafa i le latou mau na tuuina atu le Komiti Faapalemene, ona o se fuafuaga e aveeseina ai i latou pe afai e pasia Tulafono Taufaaofi o loo vevesi ai nei le atunuu.
O le tulafono o Fanua ma Suafa 1981 o loo iai faatonu poo sui o le atunuu, peitai, na faailoa e Lalau laauli Talauta Laupepa o se tulaga e faanoanoa ai ina ua aveese faatonu e aunoa ma se faamatalaga i se mafuaaga.
“E le valea toeaiina na o latou faia lea tulaga taua e tatau ona iai sui o le atunuu i le Faamasinoga o Fanua ma Suafa”.
E toaono i latou auai atu e fai ma sui o le Vasega Faatonu a Samoa; ma sa latou tā’ua ai, ua aveese faaleiloga Faatonu o le Faamasinoga o Fanua ma Suafa e aunoa ma se mafuaaga.
O i latou sa mafai ona auai atu i Mulinuu, o Lalau Laauli Talauta Laupepa, Leuluaialii Nero Duffy Ah San, Tevaga Sasulu Vainalepa, Malu Tofilau Fa’ala’aitaua, Masi Levi Hunt ma Talamatavao Sara Tyrell na oo atu i luma o le Komiti Faapalemene i le Aso Tofi ua tea nei.
Sa faailoa e i latou nei i le latou mau tusitusia, sa latou faitau i le tulafono taufaaofi o Fanua ma Suafa 2020, ma ua mautinoa ai le aveesea O Faatonu.
“O Faatonu o sui ia o le atunuu, ma o le Faamasinoga foi o Fanua ma Suafa e faavae i tu ma aganuu a Samoa”.
“Sa fesiligia foi matou e le Komiti i le mafuaaga ua aveese ai matou, ia, e leai se mafuaaga, e lei faapea fo’i ua talanoa mai pe logo mai foi matou i se faatalanoaga”.
(2)
