Teena e le Faipule Tuuaiga ua ia Faaaogaina Seleni a le Poloketi Miliona a lona Itumalo

"O le tusi tupe a le itumalo Faasaleleaga Numera 2, o loo uumia lea e le failautusi a le Fono Faavae"

0
2208

Ua teena malosi e le Sui Faipule o Faasaleleaga Numera 2, ni tuuaiga ua ia faa’aogaina se selau limasefulu afe tala ($150,000) mai le poloketi miliona a lona itumalo.

I se Pepa o Faamatalaga mai le Sui Faipule ua ia faailoa ai, na te le’i fa’aaogaina se vaega o lea seleni, ma e sese tuuaiga ma faamatalaga ua feavea’i nei.

“E leai, leai lava se seleni o nei tupe uma ua tuuaia ai a’u ua ou faaaogaina.”

Check out Leap Year Specials at SSAB

Tā’ua e le Sui Faipule o ia fo’i o le Minisita Lagolago o Tupe, o le tusi tupe a itumalo o loo uumia lea e le Failautusi a le Fono Faavae talu mai lava le amataga o le poloketi.

I se faatalanoaga ma le Sui Faipule, sa ia toe tāua ai, o le Komiti o le Fono Faavae a le itumalo, o loo latou faatinoina le fa’aaogaina o seleni i auala ua uma ona faapolokalameina.

Sa toe faamamafa mai e le Sui Faipule, e le mafai ona tupu se tulaga faapea, o lona faaaogaina o se seleni a le itumalo.

O le isi saunoaga a Magele Sekati i le Pepa o Faamatalaga, sa ia tā’ua ai, o loo iai faafitauli a isi Itumalo o Samoa, i le faatautaia o le Poloketi Miliona.

“Ua outou silafia o lenei faamoemoe Poloketi o se mea fou e lei iai muamua ma e tele ona luitau ao tau faatulaga mai e pei foi ona tatou molimauina i isi itumalo uma o le atunuu.

I le folasaga a le Sui Faipule o loo tā’ua ai ua maaea ona tuuina atu le lipoti o le faaaogaina o tupe uma i le Matagaluega mo a latou iloiloga masani.

Petai, o loo faamaoniaina mai e se Sui o le Matagaluega o Tina ma Tamaitai (MWCSD), o loo faasolo nei ni suesuega faalotoifale (internal investigation) faatasi ma le Matagaluega o Tupe, i lea mataupu.

Sa lipotia foi e le nusipepa o le Samoa Observer, sa latou faatalanoaina nisi o le Komiti a le Itumalo o Faasaleleaga 2 faapea foi ma le Sui Taitaifono, ma sa faaalia ni popolega oi latou, i lea tinoitupe e $150,000 tala sa faagaganaina mo totogi o le aufaigaluega a le Ofisa.

Na agiga i luga o upega tafailagi ma fesootaiga televavave le tuuaiga ua fa’aaogaina e le Sui Faipule le $150,000 tala e fausia ai lona maota ma fai ai ana pisinisi.

Peitai, e pei ona folasia e le Sui Faipule, e matuai leai se faavae o ia tuuaiga uma.

Sa aumai ai fo’i ma se faatoesega i le Itumalo mo ni sese o le faatinoina o le galuega.

O le afioga i le Sui Faipule ia Magele Sekati Fiau na filifilia mai i le palota tele o le 2021, mai lona itumalo o Faasaleleaga No2 ae faatoa 35 tausaga o lona soifua ma faia ai o ia ma faipule au pito laititi o le paeaiga lona 17 o le Palemene.

O loo avea nei o ia ma Minisita Lagolago o Tupe. O le nofoa o lona itumalo o loo ia uumia sa tulai mai ai se sui sinia o le HRPP ia Gatoloai Ama Gidlow Tofilau.

Faasalalauga Taua

Avanoa Faigaluega