Ua teena e le Kapeneta se fesoasoani tau seleni mo le taotoga o Luckypumba Sa, 8 tausaga, sa ave i Niu Sila i lalo o le polokalame a le Matagaluega o Soifua Maloloina mo ē su’e avanoa i togafitiga tau fomai faapitoa.
I le tali mai o le Minisita o Soifua Maloloina, le afioga ia Valasi Tafito Luapitofanua Selesele, na ia saunoa ai e faapea, sa tapena lava le PK (Pepa mo le Kapeneta) i le fonotaga masani i le vaiaso talu ai.
“Peitai, o le faaiuga aloaia a le Kapeneta, ua le taliaina e le Kapeneta ona o faiga faavae masani a lo tatou Malo”.
Saunoa Valasi, sa tuuina atu uma ripoti i luma o le fonotaga a le Kapeneta..
“O le ripoti mai le fomai faapitoa o loo vaaia Lucky i Niu Sila faapea ripoti mai le tatou fomai ia Papalii Dr Benjamin o loo auai i feutuaiga uma ma ogatotonu i fetusiaiga nei..”
“O inā sa fua iai se faaiuga a le Kapeneta, ma ua uma foi ona faamafanafana i aiga o loo i Niu Sila..”
Sa saunoa foi le Minisita ia Valasi sa lā feiloai ma le tinā o Lucky, ma ua uma foi ona ave le faamafanafanaga i le tinā.
“Ua uma ona faailoa foi i le tinā ia Faaoo, ua manatu le Malo o le a toe aumai le alii o Lucky e mafuta iai aiga i Samoa nei, ona e faapea mai le ripoti, e 50:50”.
O le 50:50 e pei ona saunoa iai le Minisita, o le faatulagaina lea e fomai o le avanoa e toe foi ai Lucky i le malosi o le tino, pe afai e faataunuu togafitiga uma, lea e tusa ma le $250,000 tala lona tau pe sili atu foi.
“.the cure rate for this would be at best 50%.. it is incredibly expensive in the $250,000+ range and as there is always a risk of complications, the costs are not guaranteed to a specific amount.”
I se faatalatalanoaga a le SGN ma le tinā o Lucky o loo i Samoa nei, sa lē mafai ona tali le maligi o loimata o le tinā ia Faaoo.
“Sa faamoemoe lava i le Malo e maua mai ai se fesoasoani peitai o lea ua siliga se fesiasoani..”
Saunoa le tinā ia Faaoo, o se faanoanoaga tele le faigofie ona fai le faaiuga e tuu mai loa Lucky e foi mai i Samoa, e mafuta i aiga. O lana faaiugaina o lenei faaiuga, e toe foi mai loa Lucky e faatalitali lona taimi.
“O lea e laititi lona soifua, ma o lea e iai lava le avanoa 50 pasene e togafitia ai ma toe maua lona malosi, ae ona o le taugatā tele ua le mafai ai..
“Paga lea ua leai se fesoasoani mai, atonu ai ona o matou, o ni tagata maualalo, e lē o ni tagata taualoa..
“O lenei faaiuga, e pei ua atagia mai ai le leai o se faatuatuaga, pe foliga mai e pei ua le amanaiaina ma tuulafoaina o ia..
“Tuu ia i luma o Le Atua atonu o loo ia silafia mafatiaga o Lucky.”
O le aso 22 o Me 2022 na faimalaga atu ai Lucky ma lona tamā mo sailiga fofo i Niu Sila i lalo o le polokalame faavaoimalo. O lea polokalame e totogi e le aiga pasese, visa fee ma itu eseese uma o le malaga, ae fesoasoani le Malo e ala i fomai faapitoa ma togafitiga uma.
O le masina o Oketopa 2021 sa muai ave ai Lucky i le falemai i Motootua, peitai, sa leai se scan e mafai ai ona iloa tonu lona mai. Sa faatonu le aiga o Lucky e sauni mo Amerika Samoa e fai ai lana scan. Saunoa Faaoo, e uma le tausaga e lei iai se toe fesootai atu o le Matagaluega, ae ina ua toe tigaiga Lucky ia Ianuari, sa toe oo mai ai foi.
O tapenaga uma sa toe alu ai le isi 4 masina, ina ua iu lava mafai loa ona malaga i le Aso 22 o Me.
O le umi o le taimi e faavae ai se manatu o Faaoo. “Ana o se fanau a nisi taualoa, e talitonu e ave lava e le Malo ia Oketopa o le tausaga lea ua tea..”
