Taunuu le Vaalele Fou a le Talofa Airways, Amatalia Faigamalaga i Tonga

0
465

Ua taunuu le vaalele fou a le Talofa Airways ma le faamoemoe o le a amatalia ai faigamalaga i le va o Samoa ma Tonga.

Na faamaonia mai lea tulaga e le tamaitai pule o le Talofa Airways, le faletua ia Maria Westerlund Hunter.

Saunoa Maria, o le vaiaso na sei mavae atu nei na taunuu ai i Faleolo le vaalele fou a le kamupani, ma o loo faia iai galuega masani mo le pasia atoatoa ao le’i fa’aaogaina mo faigamalaga.

“O le auga autu lava o le siitia lea o le auaunaga ma le tautua mo tatou tagata o loo femalagaai, aemaise o le faalautele atu lea o le tautua a le Talofa i isi atunuu tuaoi.”

O le Aso 14 o Novema o loo faamoemoe e faataunuuina ai se malaga muamua i le va o Samoa ma Tonga.

O le vaalele fou lenei na tuua Honolulu  Hawaii mo Samoa i le vaiaso talu ai, ma sa faafoe mai e Thomas Lopex, o le Pule Sili o le Gateway Company i California. Sa la toalua ma lē ana le Talofa Airways, le alii pailate ia Toleafoa Jeffrey Hunter.

O le taimi nei o loo fa’aauau pea le tautua a le Talofa Airways mai Faleolo mo Pago Pago. E lē o iai se vaalele a le Talofa Airways o fa’aaogaina i le malae vaalele i Fagalii.

Ina ua tatalaina le malae vaalele i Fagalii sa faaalia ai finagalo o le Talofa Airways faapea le Pule Sili o le Samoa Airways, i le tulaga faaletonu sa iai le ala vaalele (runway).

O le taunuu ai o le vaalele fou ua atoa ai loa le tolu o vaalele o le a faatino ai le auaunaga ma le tautia a le Talofa Airways mo le mamalu o le atunuu o loo feāfioa’i.

O le tautua a le Talofa Airways, o se taumafaiga a pisinisi tumaoti. E faatupe uma lava ma atiinaeina e Maria ma Toleafoa Jeffrey Westerlund. E ese mai le auaunaga a le Samoa Airways o loo faatupeina e le Malo o Samoa.