E Lua Moliaga o le Faisoti Tagata Paivalea Fasaga i le Ave Pasi

0
754
Sa vaaia le motu lua o le pasi a le Laumoosoi i lea taeao, Aso Gafua 2 Oketopa 2023. Ata pueina: SGN.

Ua faa’auau pea ona taofia i Tanumalala le ave pasi a le Laumoosoi lea na tulai mai ai se faalavelave i Malifa i le Aso Gafua 2 Oketopa 2023.

E toalua nisi o le mamalu o le atunuu sa malaga mai Falealili i lea i lena taeao ua maliliu. O se tamā na maliu i le falemai i Motootua, ma se isi fo’i tamā na tea i tua i le Aso Gafua ae maliu mai lona aiga i Tafatafa i le vaveao o le Aso Lua.

Na tula’i le ave pasi, le susuga ia Togamataimoana Vaea, 35 tausaga mai le afioaga o Siumu mo le taimi muamua i luma o le Faamasinoga Maualuga i le amataga o le vaiaso nei.

O le pasi a le Laumosooi MO 123 – e lei pasiaina ma e leai se Warrant of Fitness.

E lua moliaga o le fasioti tagata pa’ivalea (motor manslaughter) o loo molia ai Vaea, ina ua maliliu ni tamā se toalua e 66 ma le 64 tausaga.

E lua foi moliaga o le ave taavale faatamala ua maliliu ai nisi (negligent driving causing death) ae 31 moliaga o le ave taavale faatamala ua manunua ai nisi o le pasese e toa tolusefulu tasi.

E tasi le moliaga o le ave taavale le  faautauta i luga auala tele, ma le moliaga e tasi o le faafoeina lea o se taavale e le’i laiseneina faaletulafono.

E le’i mafai ona tuuina mai se tali a le ave pasi i luma o le Faamasinoga i le amataga o lenei vaiaso, ona sa talosaga le itu a le Loia Sili (Prosecution) mo se isi avanoa se’i tau faamae’a mai ai a latou tapenaga.

O lenei faalavelave matautia na tulai mai i le taeao o le Aso Gafua 02 Oketopa, sa vaaia ai le motu lua o le pasi. E alu ese lava le pito i luma o loo iai le foeuli, mai le pito i tua o le pasi.

 

 

Sa vaaia le motu lua o le pasi a le Laumoosoi i lea taeao, Aso Gafua 2 Oketopa 2023. Ata pueina: SGN.

Sa faailoa e se tasi o talavou, Iosua Nouata, sa sau ai i le pasi i lea taeao toe masani ona malaga mai i lea pasi mai Falealili ma Siumu, ua leva ona fealuai le pasi lea a le Laumosooi e leai ni taofi.

“Ae sa faa’aoga ma faamoemoe le ave pasi, i lona tomai e taofi kia ai le pasi, peitai, ua motu le kifi, na le mafai ai loa ona faatino le auala lea o le taofi kia, lea sa masani ona fa’aaoga e Moana.”

O le molimau foi a lea talavou, o le pasi usu lea a lo latou itumalo. Ae le ola se moli o lea pasi.

“E eai ni moli e mumu atu i le taimi o le malaga usu i le 6 i le taeao. Ae faamoemoe i moli o telefoni e faailo atu ai o loo iai tagata o loo faatali pasi i le auala, e iloa mai ai e le ave pasi.”

E le o se taimi muamua lea ua tulai mai ai se faalavelave i pasi a le fale pasi lava lenei o le Laumosooi ma aafia ai le mamalu o le atunuu o loo feoai ai.

E toe valaauina lenei mataupu ma toe tulai ai Togamataimoana Vaea i luma o le Faamasinoga Maualuga i le Aso 23 o Oketopa 2023.

Public Notice