Talosaga le HRPP mo se Avanoa e Tali atu ai i Tuuaiga a Sui Faipule na Faamavae
I le faagasolo ai o le mataupu a faipule e toatolu lea sa faamavae mai le HRPP, sa tuuina atu ai se talosaga a le vaega faaupufai e Puipuia Aia Tatau a Tagata mo se avanoa e faaulu ai se latou itū i le faamasinoga.
Sa tulai le alii loia ia Fuimaono Sefo Ainuu e finauina le finagalo o le HRPP e tatau ona tali le vaega faaupufai i tuuaiga a Sui Faipule na fofogaina i totonu o le Palemene ina ua latou faamavae.
Saunoa Fuimaono Sefo Ai’nuu, “o loo taoto i totonu o le Maota, saunoaga a Sui Faipule sa latou tuuaia ai le HRPP.
E tusa ai ma se saunoaga a le Sui Faipule mai Siumu le tofa ia Tuuu Anasii Leota, “Na mafua ona faia nisi o teuteuga i le Tulafono o Faigapalota, ina ia saga faamautu ai pea le malosiaga o le HRPP na te pulea ai pe na te taitaiina ai le atunuu..”
Taua e Fuimaono, o se tuuaiga e tatau ona tali atu iai le HRPP.
“Ma o lea e tatau ai ona avea le HRPP ma se itū auai o lenei faamasinoga.”
Peitai na tali le tamaitai loia ia Muriel Lui, o loo tulai mo faipule e toatolu, “O loo iai lava ta’iala o loo lima taitaiina ai galuega a le faamasinoga, ma e teena le auai mai o le HRPP mo so latou avanoa e auai ai.
Saunoa Lui, e le o le autu lea o finauga ma le mafuaaga na momoli mai ai e le Fofoga Fetalai o le Maota, Papalii Lio Taeu Masepa’u lenei mataupu mo se finagalo o le Faamasinoga.
“Afai ae tuu le avanoa e auai mai ai le HRPP, lona uiga o le a le tusa ma taiala o loo lima taitaiina ai galuega a le Faamasinoga.”
Ua ma’ea taualumaga o lenei mataupu, peitai, e lë o faailoaina mai e lana afioga ia Leiataualesa Daryl Clarke se aso e tuuina mai ai sana faaiuga o lenei mataupu.
(2203)
