E tele Aiaiga o le Tatala ai i Tua o Talalelei Pauga e aofia ai ma le Bond $2,000 Talā

0
1739
File photo, Talalelei Pauga outside court with King Faipopo, 2019

Ua tatala i tua Talalelei Pauga, e tālia ai le aso e suesue ai le mataupu o loo molia ai nei o ia i le Faamasinoga Maualuga o Samoa.

O Pauga lea sa auina faapagota mai i Ausetalia e tali i ona moliaga o le taupulepule lea e faaoo le oti i lē sa avea ma Palemia o Samoa, Hon Tuilaepa Sailele Malielegaoi.

Sa tuuina atu e le alii loia o loo tulai mo Pauga lenei talosaga ma talia ai e le Faamasinoga Maualuga i le vaiaso na te’a nei.

O aiaiaga e tatala ai tua e pei ona faatulaga mai e lana afioga ia Justice Niava Mata Tuatagaloa, e aofia ai le tuuina atu ona pepa malaga, saini faavaiaso i le Ofisa o Leoleo i Apia, ma le faasa lea ona ia faia ni tusitusiga i luga o fesootaiga televavave poo le social media.

Sa faatonuina foi Pauga e nofo mau i Lalovaea, ma e tapu lona taumafai e faafesootai molimau a leoleo.

E $2,000 se tino i tupe (bond) sa poloaiina e le Faamasinoga e totogi e Talalelei Pauga.

O se faamaoniaga lea o lona lē solia o aiaiga e pei ona tuuina mai e le Faamasinoga.

Afai e solia aiaiga o le tatalaina o ia i tua, o le a toe faafoiina lenei tino i tupe $2,000 i ona lima.

O loo teena e Talalelei Pauga moliaga o le itu a leoleo, e tauala mai i lana loia o Tufuga Fagaloa Tufuga.

O Talalelei Pauga o loo tu’uaia i lona auai lea i le taupulepulega e faaoo le oti ia Tuilaepa Sailele Malielegaoi, faapea ma le sa avea ma Komesina o Leoleo talu ai nei, o Fuiavalili Su’a Egon Keil.

O loo tuli nei faasalaga falepuipui a nisi e toatolu sa latou taupulepule e faaoo le oti i le sa avea ma Palemia.

O Taualai Leiloa sa tuuina mai e le Faamasinoga le 6 tausaga. O Lema’i Sione e 4.5 – fā ma le afa tausaga, ae o King Faipopo poo Malele Paulo, e 4 tausaga le faasalaga falepuipui o loo tuli nei.