Tālia e le Matagaluega o Leoleo le Tali i se Talosaga mo Totogi Talafeagai – Silia ma le 100 e Faamavae i Tausaga Taitasi

"E mafua i le tele o itula faigaluega aemaise o itula ova taimi, ae lē o maua faamanuiaga poo totogi talafeagai."

0
889

E silia ma le selau alii ma tamaitai Malu o le Malo sa faamavae mai le matagaluega i totonu o le tausaga e tasi.

O le lē talafeagai o totogi pe a fua i itula ma le mamafa o le galuega, le mafuaaga numera tasi lea o le faamavae o leoleo mai lo latou valaauina.

O le saunoaga lea a le Komesina o le Matagaluega o Leoleo, le afioga ia Auapaau Logoitino Filipo.

“E silia ma le selau le aofai o leoleo na faamavae mai le matagaluega i le tausaga ua mavae [2023]..

“E mafua i le tele o itula faigaluega aemaise o itula ova taimi, ae lē o maua faamanuiaga poo totogi talafeagai.”

Saunoa Auapaau, ua maea ona latou feiloai ma le Komiti Faufautua o Totogi (Remuneration Tribunal) ma tuuina atu iai se talosaga mo totogi talafeagai mo le auaunaga a leoleo.

“Ia, o loo tālia la i le taimi nei lea feiloaiga mo se faaiuga mai le Kapeneta, i se latou foi tofa i le matou talosaga na tuuina atu i le Komiti Faufautua o Totogi.”

I le taimi nei, o leoleo amata i le Matagaluega o Leoleo, e pito sili ona maualalo a latou totogi pe a faatusatusa i totogi o leoleo amata o le Falepuipui faapea le aufaigaluega a le Tineimū.

O le lua vaiaso ao faamanatuina aso fiafia o le Kerisimasi ma le Tausaga Fou, sa malolo uma galuega a le Malo. O le masani lava lea i tausaga uma.

Ae peitai, o le taimi tonu lea e tula’i mai ai le Matagaluega o Leoleo i lo latou auaunaga e puipuia le saogalemu o le atunuu.

“O le Matagaluega o Leoleo le isi auaunaga sa galulue faasolo atoa, e aunoa ma se malologa..”

Sa faamauina fo’i le siitia o mataupu na valaau mai e le mamalu o le atunuu se fesoasoani a le Matagaluega o Leoleo i taimi o aso fiafia. E 16% pasene le siitaga mai le tausaga talu ai.

“E 463 mataupu na valaau mai mo se fesoasoani, ma agai atu iai leoleo. E se mai galuega masani e pei o le faatinoina o poloka i auala e taofia uma ai ē o loo ave taavale faasuaava.”

E silia ma le 900 le aofai o leoleo o loo galulue i le taimi nei, e aofia ai Upolu ma Savaii.

Na saunoa Auapaau i se faatalatalanoaga talu ai, e lē o ausia le fuainumera moomia e tatau ona iai le aofai o leoleo e galulue mo le puipuia o le saogalemu o le atunuu (ratio to population).

O Samoa lea ua silia ma le 200 afe (205,557) ona tagatanuu, ae o loo matauina pea le faitau afe ma afe o tagata tafafao mai fafo sa faatumulia ai vaalele malaga mai i Samoa.

E ui ina toatele leoleo e aoaoina ma faaulufaleina i tausaga taitasi, ae o loo siisii pea le fuainumera e toesea ona o le lē lelei o faamanuiaga ae maise o totogi.

O le tausaga lenei lea e talimao ai Samoa i le fonotaga tele a Malo o le Taupulega (CHOGM 2024). Ma o le Matagaluega foi o Leoleo e taulamua mo le itū tāua o le puipuiga o Taitai o atunuu e silia ma le 50 o le a auai mai i Samoa.

O loo galulue faatasi le Matagaluega o Leoleo ma Malo tuaoi o loo fesoasoani mai mo itu uma tau puipuiga i le taimi o le CHOGM.

O le toatele o leoleo ua toe faamavae, ua latou maua avanoa e malaga atu ai i galuega faavaitaimi. O nisi e galulue i isi auaunaga a le Malo poo kamupani tumaoti foi, e saili ai lumanai mo latou ae maise aiga.

Vacancy Announcement