Soloia le Nofo Gatoaitele na Faatino i le Tausaga 2014

"Ua poloaiina nei le lesitala o le Faamasinoga ina ia tuueseina le suafa o Gatoaitele o Savea Porotesano Malifa mai le Lesitala o Matai Samoa."

0
1354

Mai le tausaga 2014 na faatino ai le nofo a le afioga iā Savea Sano Malifa i le suafa Gatoaitele, ma resitalaina i le 2016, ae ua toe soloiaina nei i le 2023.

O le Aso 21 o Novema 2023 na toe tagofia ai e le Faamasinoga o Fanua ma Suafa le talosaga apili a Alii ma Faipule o Afega, ina ia soloia le suafa Gatoaitele mai ia Savea Porotesano Malifa.

le itu talosaga e silia ma le luasefulu matai o le afioaga o Afega e taitaia e le afioga i le Faipule iā Maulolo Tavita Amosa. Ae o le itu tetee na tulai ai le afioga iā Saena Tialino Penaia II, Fata Ueli, Fata Leaoga, ma Fata Ryan Schuster.

O le mau a le itu talosaga a Alii ma Faipule, e leai se Gatoaitele i Faalupega o Afega, ma e leai foi se matai e suafa ia Gatoaitele i le nuu o Afega,

Sa tuuina atu e Alii ma Faipule e faapea, o le Aso 9 Iuni 2014 na tu ai le tootoo, e faailoa le finagalo o le nuu, ia taofia le nofo sa fuafuaina, peitai, sa fa’aauau pea e Savea ma lona auaiga.

Sa tā’ua foi i mau a le nuu e faapea, sa i tua Savea mai le faiganuu i lea taimi, ona sa faate’a o ia i le tausaga 2012 ina ua fai le nuu a Savea ma Pito Faalogo.

“Sa soli tu foi e le nuu lea faamoemoe.”

Sa fesiligia e le itu tetee se tasi o molimau a le itu tetee, le afioga iā Saena Tialino Penaia II.

O le mau a Saena, “O faamoemoe a aiga pe afai ua autasi iai so latou finagalo, e lē tau faanoi i le nuu mo le faatinoina o se nofo.”

Peitai i le tuuina mai o le faaiuga a le Faamasinoga o Fanua ma Suafa na latou tā’ua ai, “O se mau faapa’ia-mata, o se mau foi e tutupu ai maseiga i totonu o nuu ma le va o aiga..”

Sa taunuu ai le Faamasinoga i le faaiuga, “E tusa ma mau ua folasia, e le’i aliitaeao ma usu fa’aaloalo le afioaga, ma o le vaitau foi na faatino ai le nofo, ua manino foi o loo tua ma le faiganuu Savea i lea taimi..”

“Ua poloaiina nei le lesitala o le Faamasinoga ina ia tuueseina le suafa o Gatoaitele o Savea Porotesano Malifa mai le Lesitala o Matai Samoa.”

Ua tele tausaga o va le fogavaa i totonu o le afioaga o Afega, e pei ona lua ai faiganuu. O le tasi o nuu o loo fainuu ai le faipule le susuga iā Maulolo Tavita Amosa, ao le tasi o nuu o loo fainuu ai le afioga iā Savea Sano Malifa.

O le afioga ia Savea Sano Malifa o se tasi o poutu o le vasega o faasalalau (media) i totonu o Samoa. Ua silia ma le 45 tausaga o loo tautua o se Faatonu o le Samoa Observer, ma o le pau foi lea o le nusipepa lolomi i totonu o Samoa. E tele faailoga (international awards) o loo ia uumiaina i lenei tautua.

Public Notices