Saunoaga o le Tala Faatatau Faaopoopo Muamua o le Tup

SAUNOAGA O LE TALA FAATATAU FAAOPO’OPO MUAMUA O LE TUPE 2018/2019

 Lau Afioga i le Fofoga Fetalai ma le mamalu o le Palemene,

E ia te a’u le ava ma le faaaloalo tele, e avea ai a’u ma Sui o le Malo, e tuuina atu i luma o le laulauafono a le Palemene le Tala Faatatau Faaopo’opo Muamua o le Tupe 2018/2019.

Lau Afioga i le Fofoga Fetalai,

O le Tala Faaopo’opo Muamua o le Tupe ua folasia nei i luma o le Maota, o lo’o sosolo lava i luga o le sini autu o le filifiliga toa e ala lea ile iloiloina toto’a o talosaga uma sa tu’uina mai ma fetu’una’i lelei ina ia mafai ona fa’aauauina atina’e ua ave iai le faamuamua a le Malo aemaise o auaunaga taua mo le soifua manuia o tagatanuu uma o Samoa.  O lea, ou te fiafia e faailoa atu ua mafai ona fa’atupeina talosaga uma i lalo o lenei Tala Faaopo’opo Muamua o le Tupe, i tupe maua faaopo’opo a le Malo fa’atasi ai ma le toe fetu’unaiga o tupe alu ma e lē o aafia ai le pasene o faasiliga o tupe alu a le Malo i ona tupe maua pe a faatusa ile tamaoaiga mo le tausaga faaletupe o lo’o faagasolo nei.

Ou te fiafia fo’i e fa’ailoa atu le si’itia lea o le tamaoaiga o le atunu’u ile 0.7% i le tausaga faaletupe ua mavae atu, 2017/2018. E ui ina le’i ausia le vaaiga mamao sa fuafuaina, o lo’o matauina le si’isi’i pea o le tamaoaiga ona o atina’e tetele a le Malo o lo’o fa’atinoina nei, faatasi ai ma isi galuega lea ua amata faagasolo ile taimi nei. O le fa’atupula’ia o le tamaoaiga ile Tausaga 2017/2018, sa una’ia malosi e le atina’e o Tagata Tafafao Maimoa mai Fafo, po’o le vaega o Turisi ma ua atagia ai le sao taua o le talimalo o Samoa i fonotaga faava-o-malo e aofia ai le fonotaga a Malo o le Taupulega mo Feso’ota’iga Faaneionapo; Fonotaga a Taitai o Malo o le Pasefika, Fonotaga a le Lalolagi mo le Atina’eina o le Ulu; fa’atasi ai ma le Fonotaga Muamua a Minisita o le Pasefika mo le Puipuiga o Malie.  Ua matauina fo’i le sao taua o le Vaega mo Feso’ota’iga ile tulaga siitia ole tamaoaiga ona o le faatupula’ia ole fa’aaogaina o lenei tekonolosi e ala ile Tui Samoa Cable.  E ao fo’i ona ou ta’ua atina’e tetele o le Malo e aofia ai le malae vaalele faavaomalo i Faleolo; o le uafu i Matautu; faalauteleina o auala ile itu i Sisifo o Upolu; ma isi galuega tetele o lo’o fa’aauau pea o lo’o una’ia malosi ai le vaega tumaoti ma si’itia ai lo tatou tamaoaiga.

Lau Afioga i le Fofoga Fetalai,

Mo le tausaga faaletupe 2017/2018, sa maitauina ai se faasiliga o tupe maua a le Malo i ana tupe alu e tusa ma le 0.1% o le tamaoaiga, ma o se faasiliga maualuga pe a faatusa i le 3.5% o le fua faatatau o tupe pa’ū o lo’o limata’ita’iina ai le Faasoa a le Malo mo le tausaga nei fa’atasi ai ma le va’ai taula’e ia tu’uitiitia ile na o le 2% ma ua atagia ai le finagalo o le Malo e si’itia ana tupe maua ae mataitu lelei ana tupe faaalu.  O tupe maua mai lafoga sa si’itia ile 1.6% pe a faatusa ile tausaga i tua atu ma o lea faasiliga ua mafai ona tuuiti’itia ai tupe pa’ū o lo’o aoina mai i auaunaga masani a le Malo.  I le mae’a ai o le 3 tausaga so’oso’o o tu’uitiitia pea tupe fa’aalu mo polokalame a Matagaluega ole Malo, sa matauina se si’itaga laiti’iti i le Tausaga Faaletupe 2017/2018 ina ua amata tauaveina e le Matagaluega o Tupe le faafoeina o tulaga tau tupe a le Auaunaga FaaSoifua Maloloina e pei ona amata faamamaluina ia Ianuari 2018.

O le 2017/2018 e pei ona ou ta’ua muamua, o se tausaga mao’ae ile tele o atina’e tetele a le Malo sa mafai ona faama’eaina ai e pei o le Tui Samoa Cable, ma faatulaga ai loa vaega faa’iu mo atinae fa’aauau e pei o Malae Vaalele i Faleolo, Maota o le Fono Aoao Faitulafono i Tiafau; galuega fa’aauau mo atina’e tau auala ma alasima; faatasi ai ma atina’e mo malosi’aga fa’afouina.

Lau Afioga i le Fofoga Fetalai,

O nei taunu’uga uma sa mafai ona ausia ile fa’asoasoaina lelei o punaoa a le Malo ina ia mafai ona tali atu i manaoga a le atunu’u aemaise o atina’e o lo’o ave iai le fa’amuamua, ma o lo’o atagia  ai faiga pulega lelei e ala ile mataituina lelei o punaoa a lo tatou Malo, ma le atunu’u.

Lau Afioga i le Fofoga Fetalai,

Ona o lenei tulaga, ou te faailoa atu o lo’o aofia i lenei Tala Fa’atatau Faaopo’opo Muamua ole Tupe le vaega muamua o le si’itaga o totogi a tagata faigaluega a le Malo lea o le a amata faamamaluina i le totogi muamua o le masina o Ianuari 2019.  O le masina fo’i o Ianuari ole a si’itia ai le penisione o tagata matutua o le atunu’u mai ile $135tala ile $145 tala.

O le fa’atinoga o lenei si’itaga e faapea: E amata atu ia Ianuari 2019, e 5% o le a siitia ai totogi mai le vaega o Ofisa Sinia (Principal Officers) aga’i atu ile aufaigaluega totogi amata; ae  3% le si’itaga mo Ofisa Sili Lagolago ma Sui Pule Sili. O Ianuari 2020, o le a si’itia uma ai totogi o ē ua ta’ua muamua ile 3% faatasi ai ma Ofisa Sili o Matagaluega ma Faalapotopotoga a le Malo, le Kapeneta, Sui Usufono ole Palemene fa’atasi ai ma le vaega o Faamasinoga.  O Ianuari 2021, o le a fa’atino ai le vaega lona tolu po’o le vaega mulimuli fo’i o lenei si’itaga, ma e 2% o le a si’itia ai le aufaigaluega uma a le Malo.

Lau Afioga i le Fofoga Fetalai,

O lenei si’itaga ua talafeagai pe a faatusa ile si’itia o le tau ole soifuaga talu mai le si’itaga mulimuli o totogi ile tausaga 2014. Ina ia tausisia pea ele Malo le sini autu o lo’o limata’ita’iina ai lana faasoa, “O le filifiliga toa“, o lea ua fetu’una’i ai e le Malo nisi o ana atina’e e fa’atino auaua’i i tausaga o i luma ae ave le fa’amuamua ile si’itaga o totogi e pei ona faailoa atu.

Tala Faatatau Faaopo’opo Muamua o le Tupe:    

Lau Afioga i le Fofoga Fetalai,

O se otootoga lenei o vaega tāua o lenei Tala Faatatau Faaopo’opo Muamua o le Tupe mo le tausaga faaletupe 2018/2019.

O le aotelega o tupe alu faaopo’opo ua mafai ona faatupeina i lenei Tala Faaopo’opo Muamua ole Tupe e tusa ma le $19.4miliona ma e aofia ai se vaegatupe e $2.1 miliona mo poloketi ma polokalame ua faamatu’uina mai e a tatou paaga ile ma’ea pasiaina ai ole Tala Faatatau Autu o le Tupe ia Iuni 2018.O  nei vaegatupe e fa’asino tonu i polokalame e tusa ma maliega ua ma’ea sainia ma a tatou paaga.

O tupe alu faaopo’opo mo polokalame a Matagaluega e tusa ma le $17.3miliona o le a mafai ona faatupeina mai i tupe maua faaopopo ma faasiliga o tupe maua e $11.3miliona fa’atasi ai ma le fetuuna’iga o tupe fa’asao e tusa ma le $5.97miliona.

Aotelega o Tupe Maua:

O le aotelega o faasiliga o tupe maua ma tupe maua faaopo’opo e $11.3miliona ma o le a auiliiliina atu, e lē o aofia ai le $2.1miliona o tupe mo atina’e mai i paaga mai fafo:

• $3miliona o se vaegatupe faaopo’opo mai ile fesoasoani masani a le Malo o Niu Sila ona o le faataunuuina lelei o galuega ma le ausia o alafua e pei ona iai le maliega i lalo o lea fesoasoani;
• $4.1miliona le fa’asiliga o tupe mama a Faalapotopotoga a le Malo (dividends), o lo latou sao lea ile faatupega o atina’e o le Malo;
• $1.8miliona e siitia ai lafoga mai totogi ona o le siitaga;
• $2.1miliona e siitia ai lafoga i luga o oloa ma auaunaga ona o le faamoemoe mo le fa’atupula’ia o fefaataua’iga e afua mai ile siitaga;
• $331,945 lafoga faaopo’opo mai Matagaluega ona o tupe alu faaopo’opo.

 O le aotelega o vaegatupe maua mai ile fetu’una’iga o tupe faasao mai tupe alu e $5.97miliona ma e aofia ai:

• $5.8miliona mai Tupe Faatulafonoina – E $1.3miliona ua mafai ona faasaoina mai tupe fa’aaga’aga mo le tau o le fesuiaiga o tupe, $3.3miliona ua faasaoina mai i vaegatupe fa’aaga’aga mo le toe faaolaina o lafoga totogi e fua lea i faamaumauga sa tuuina mai ile Matagaluega o Tupe Maua, ma le $1.2 miliona tala tupe faasao ile ma’ea ai o le nonogatupe a le Kamupani ole Polynesian Airlines ile UTOS;
• $165,000 mai ile Matagaluega o Tupe – o nei vaegatupe ua mafai ona faasaoina mai ile fetu’una’iga o le sao a le Malo ile atina’e mo le auala sima i Vaisigano ma le poloketi mo Fa’atoaga Faifa’apisinisi.

Aotelega o Tupe Alu

O le aotelega o tupe alu faaopo’opo e ese mai i tupe alu mo atina’e e tusa ma le $17.3miliona ma e aofia ai vaega nei;

• $5.2miliona o le a si’itia uma ai tupe alu mo tagata faigaluega a Matagaluega ma Faalapotopotoga e 36 a le Malo o lo’o i lalo o le Tala Faatatau Autu o le Tupe ona o le si’itaga o totogi muamua i le masina o Ianuari 2019;
• $677,529 faaopo’opo i lalo o Tupe Faatulafonoina:
• $88,200 e faatupe ai le fetuunaiga o totogi o Faamasino e tusa ai ma le faaiuga a le Kapeneta sa faia ia Iuni 2018 i luga o fautuaga ale Komiti o Totogi a le Malo;
• $589,329 a fa’atupe ai le totogiina o le aitalafu ma tului a le STEC;;
• $30,266 faaopo’opo ile Ofisa o le Komesina o Sulufa’iga e fetu’una’i ai le totogi o se tasi o le aufaigaluega e tusa ai ma le faaiuga a le Kapeneta lea o lo’o mo’omia ai le suia o le Tulafono o Tupe Faatatauina;
• $202,600 faaopo’opo mo le Matagaluega o Faatoaga mo vaega nei:
• $28,800 e siitia ai le saofaga a le Malo ile Faalapotopotoga ole FFA;
• $143,800 e faaopo’opo i le lisi mo le Ofisa a le FAO e tālia ai se fa’ai’uga mo le latou ofisa fou;
• $30,000 o le sao a le Malo ile polokalame a le IFAD;
• $585,900 faaopo’opo e tu’uina atu ile Matagaluega o Aoga e fa’atupe ai vaega nei:
• $125,700 mo le totogi o Asiasi Aoga faaopo’opo ua faafaigaluegaina i lalo o le Matagaluega o Aoga ma e aofia ai alauni mo femalaga’iga;
• $282,100 mo fa’amanuiaga o auaunaga umi mo nisi o faiaoga ua ausia le 10 tausaga o le latou tautua;
• $178,100 mo faamanuiaga ile mae’a ai o konekarate mo nisi o Pule Aoga ma Sui Pule Aoga ua fa’amae’aina a latou konekarate;
• $2.4miliona faaopo’opo ile Matagaluega o Tupe e faatupe ai vaega nei::
• $65,000 faaopo’opo e totogi ai lafoga mo atina’e a le Malo;
• $100,000 faaopo’opo e totogi ai galuega fa’asu’etusi mo nisi o poloketi a le Malo;
• $1miliona e tuuina atu ile STEC e fesoasoani i auaunaga ma galuega faatino a’o tapena le latou Fuafuaga Alualu Mamao;
• $636,747 e totogi faamae’a ai le fa’amatu’uina mai o le fale tuai o le falema’i a le MedCen ile Malo mai ile Faletupe o Atina’e o Samoa;
• $626,820 e faaopo’opo atu i tupe fa’aaga’aga mo le penisione mo le si’itaga o lo’o fuafuaina nei ia Ianuari 2019;
• $203,100 mo le Matagaluega o le Punaoa Faalenatura ma le Siosiomaga e faatupe ai le tau ole eletise mo le faailo o faalavelave faafuase’i o lo’o faaaoga ai satelite a le Digicel;
• $177,820 mo le Matagaluega o Faamasinoga e fa’aatoa ai le fetu’una’iga o totogi o fa’amasino e tusa ai ma le faaiuga ale Kapeneta;
• $232,188 mo le Ofisa ole Komesina o Faiga Palota e totogi ai le lisi mo le NPF Plaza ma le Faletupe o Atina’e o Samoa lea ua si’itia ma faamautu ai le Ofisa mo le taimi nei;
• $284,913 mo Ofisa o le Fono Aoao Faitulafono e fa’aauau ai le totogi’ina o le latou lisi i Tuanaimato e tau ia Iuni a o tālia se faaiuga mo se nofoaga fou e faamautu ai le Ofisa;
• $5miliona mo Auaunaga Faa Soifua Maloloina. E $3miliona e faaopo’opo i vaegatupe mo totogi a le aufaigaluega ma le $2miliona e faaopo’opo mo gasegase auina atu i fafo;
• $2.26miliona mo le Matagaluega o Fale Puipui aua le faamae’aina o nisi o galuega o lo’o totoe mo le Toese fou i Tanumalala;

Lau Afioga ile Fofoga Fetalai,

O le auiliiliga lenei o le $2.1miliona mo atina’e mai a tatou pa’aga masani o lo’o folasia i  lenei Tala Faaopo’opo Muamua ole Tupe:

• $267,643 se vaegatupe mai i Malo o Ausetalia ma Niu Sila sa fesoasoani ai ile fonotaga mo le iloiloina o le SAMOA Pathway lea sa talimalo ai Samoa ile Amataga o Novema 2018;
• $560,069 se fesoasoani fai paaga a le Malo o Niu Sili mo le siitia auaunaga a le Matagaluega o Falepuipui;
• $1.1miliona mai ile Malo o Niu Sila aua le polokalame mo le siitia o faailoga taualoa mo tausi soifua;
• $101,368 mai ile UNEP e fesoasoani ai ile tuufaatasia o le ripoti mo le UNCCD;
• $101,368 e aumai fo’i ile UNEP aua le tapenina o le ripoti e tusa ole faatinoga o le Nagoya Protocol.

Upu Faaiu

Lau Afioga i le Fofoga Fetalai ma le mamalu o le Palemene,

O le Tala Faaopo’opo Muamua e pei ona tuuina atu i luma o le Maota sa tuufa’atasia ma le nauta’iga ina ia mausalī pea le tamaoaiga o le atunu’u ma ia fa’atumauina auaunaga masani a le Malo mo ana tagatanu’u.  O le a fa’aauau pea ona mataituina ma le toto’a e le Malo le fa’aaogaina o vaegatupe, aemaise o le faasoasoaina lelei o ana punaoa aua se soifua manuia o tagatanuu uma o Samoa.

Lau Afioga i le Fofoga Fetalai ma le mamalu o le Palemene,

Avea ia a’u e fai ma Sui o le Malo, e momoli atu ai alofa’aga ma faamanuiaga i lau Afioga i le Fofoga Fetalai, le mamalu o le Palemene ‘aemaise le tapua’iga a Samoa, ina ia maua se Kirisimasi fiafia ma se Tausaga fou manuia.

Soifua

(0)