Ono tausaga e falepuipui ai se tamā sa fanau ai le tama a lona toalua

0
2674

E ono tausaga le faasalaga faafalepuipui ua tuuina mai e le Faamasinoga Maualuga ina ua faamaonia moliaga e faasaga i se tamā na ia faatino fesootaiga faaleugalii I le tama teine a lona toalua (step daughter) e 12 tausaga.

Sa ioeina e lea tamā, 47 ona tausaga moliaga a le itu a leoleo o le faia lea o se fesootaiga faaleugalii I le tama teine a lona toalua, e na o le 12 tausaga lona matua.

I faamaumauga a le itu a leoleo, na faatino e lea tamā nei uiga mataga faasolitulafono i lona afafine fai (step daughter) mai le masina o Me 2021, seia oo atu i le masina o Oketopa 2022.

Sa faatoa alia’e lenei faiga mataga ina ua  iloa e le faiaoga, ua ma’itaga le teinetiti.

Sa logoina e le faiaoga le ofisa o leoleo ma faatino ai loa suesuega.

Sa fanau lenei teineitiiti sei tulou, ma maua ai le fanau masaga tama.

E 8 tausaga i le falepuipui sa amata ai le faasalaga, ona toesea lea o taimi mo le ioeina o moliaga ma itu masani a le Faamasinoga.

O lenei tamā e lē mafai ona faalauiloa le suafa poo ni nuu ona o se poloaiga a le faamasinoga, ina ia puipui ai lē o loo aafia.

O le tamā ua falepuipui nei, sa fai muamua lona toalua ma e toafitu lana fanau sa maua ai.

E faatupulaia pea moliaga o sauaga faaleusuaiga i totonu o Samoa, e aafia ai tina ma tamaitai, ma ua le faatuaoia lava tausaga o teineiti o loo aafia.