Molia nisi sa Faigaluega i le Bluebird, Tuuaia i le Toesea o se Masini Tamea, Ili Afi ma Pusa Faigaluega

Tulai nisi sa avea ma tagata faigaluega o le Bluebird Lumber i Vaitele i luma o le Faamasinoga.

E toalua nisi o taulelea na tulai i luma o le Faamasinoga Maualuga e tali atu i moliaga o le gaoi ao avea ma tagata faigaluega.

I tolaulauga a le itu a leoleo, sa tā’ua ai aso eseeese sa tōesea ai e i latou nei nisi o oloa o le Bluebird Lumber i Vaitele.

O le Aso 7 o Setema 2022, na aveesea ai ni pusa faigaluega e tusa lona tau ma $650 tala.

O le Aso 14 Oketopa o le tausaga talu ai, na faapena foi ona la aveesea ai se masini ta lavalava o le ituaiga o le Panasonic e tusa lona tau ma le $1,250 tala.

O le Aso 14 lava o Oketopa, na la’ua aveesea ai foi se ili afi e tusa lona tau ma le $1,999 tala.

Sa ioeina e Jeremiah Fesolai moliaga i le ili afi faasaga ia te ia, ma o loo tetee foi e lē sa avea le masini ta lavalava, ona sa ia saunoa ua uma ona totogia faatau lelei.

E ui ina ua maea ona talia e i laua nei moliaga, ae peitai na toe talosaga mulimuli i la’ua i se avanoa mo se loia i lalo o le polokalame a le Malo (legal aid).

Sa toe faaleaogaina ai loa e Fepuleai Ameperosa a lā tali na tuuina atu, ae sei saili ma feutaga’i ma se loia e tulai mo la’ua.

Saunoa Fepuleai, e sili ona feiloai muamua ma le loia, ona toe tuuina mai lea o sa laua tali, nei tali mai ioe, ae mulimuli ane feutaga’i ma se loia toe suia ai se la tali e tuuina mai.

O le aso 27 o le masina nei ua tolopo iai lenei mataupu.

(1)