O le taeao nei sa faateia ai le Pulega o le TV3 ma le Leitio Polenisia, ina ua maua le tala faanoanoa ua maliu le tamaitai Pule o le ofisa faasalalau o le TV 3, Aotearoa Pesamino Myers.
O le tamaitai Pule o le TV 3, sa amata galue mai le Leitio Polenisia ma le TV3 ia Aukuso 2015, ma o le 7 ai lea o tausaga o galue i le tautua o le faasalalau.
O ia foi sa fai ma Taitai ‘Au (Manager) o le kalapu lakapi a le Vaiala Ulalei, ma maitauina ai le telē o lona sao i le atina’eina o alo ma fanau i le faagatama o le lakapi.
I se feau faanoanoa sa tuuina mai e le Pule Sili o le Leitio Polenisia, Afioga ia Papaliitele Olga Keil i luga o le alaleo o le Radio Polynesia i le taeao nei, sa ia tā’ua ai le faagalo gata o le tamaiti pule, ae maise o lona sao tāua i lana auaunaga ma le faamaoni i le TV3 faapea le Leitio Polenisia.
Ua faamaonia mai e le Sui Komesina o Leoleo, Papalii Monalisa Tiai-Keti, o le tino maliu o Aotearoa sa maua atu lea i lona maota i Ululoloa, ma o loo faagasolo nei suesuega a Alii Malu o le Malo i le mafuaaga o lona maliu faafuasei.
Tā’ua e le Sui Komesina, o lenei mataupu sa faato’ai mai i le Ofisa o Leoleo i Faleata, ae o lea ua tuuina atu i le CID – Criminal Investigation Division – a le Ofisa Tutotonu i Apia.
O le taeao o le asō, Aso Gafua 23 Ianuari sa faatoa logo atu ai leoleo, ae saunoa Papalii, e lē o mautinoa i le aso ma le taimi foi sa maliu ai Aotearoa, ae o loo masalomia o le faaiuga o le vaiaso na tea nei.
O se tasi molimau sa talanoa mai i le Samoa Global News, ma faapea mai sa maua se la fesootaiga ma le tamaitai pule sili i le po o le Aso Toanai.
Saunoa Papalii e le o mautu mai pe ono faia se taotoga faapitoa (autopsy) ona o lea faatoa amata suesuega a leoleo, ma galuelue faatasi ai ma fomai.
“O loo talia suesuega a le Matagaluega ona logo ai lea o le tamaitai Faamasino o loo pulea le vaega o Maliu Lilo (Coroner) pe ono faia se talosaga mo se fomai faapitoa e faia se taotoga e iloa ma mautu ai le mafuaaga o le maliu ai o le Pule Sili o le TV3.
Saunoa foi le Sui Komesina o Leoleo, e lei iai se isi ua mōlia i le maliu o le susuga ia Aotearoa Pesamino Myers.
Ua tele ni faamaisega i luga o Upega Fai’ilagi ma le Facebook, e ofo alofa atu ai le toatele o paaga, aiga, uo ma e masani mo Aotearoa.
Ua tā’ua e le toatele o molimau ona uiga tausaafia, loto alofa i soo se tasi, ae maise o ona uiga fiafia i taimi uma.
