Ofisa Sooupu – O le tali fuaitau lenei a le Palemia Afioga Tuilaepa Dr. Sailele Malielegaoi i luga o le leitio faasalalau a le 2AP, ina ua fesiligia sona finagalo i le molia ai e Leoleo o Malele Paulo (King Faipopo) faapea foi ma se tasi o alii e suafa ia Saute Sapolu ma ana ia foi faasalalauga faasaga i le Palemia.
2AP
Lau Afioga o le a sou finagalo, o lea ua molia e leoleo ia Malele Paulo (King Faipopo) lea na ia fai ni faasalalauga i luga o upega tafailagi ma tuua’ia ai oe i le fasioti tagata ma le aumaia faanana ni container fana?
Tuilaepa
O le tãua o le mea lea o le a mafai ai ona ia aumaia ia ana molimau, ia na omai loa laia e fai le faamasinoga; tumutumu ai le ‘autusitala faalogologo i ana molimau e faamaonia ai lo’u solitulafono.
Auã e leai se aoga ou te nofonofo ai pea i i, ae o lea e fealua’i lea alii ma tala’i o a’u e fasioti tagata; e oo a i se pilioua ta te fefe tapế, ou te le faia lena mea, vagana mo le mea o le tagata e solitulafono e le alu i se lotu e na te faia na mea.
O le mea la lea, e lelei o lea o le a maua le avanoa e tūtū ai i luma o le Faamasinoga, ia ma ta’u i le Faamasino ia mafuaaga o ana tuuaiga, aemaise mea ia e fai mai ua aumai a’u containers fana, matuã faavalevalea tele nei mea, ua aumai a’u containers; e ave i fea?
E leai sa’u containers na aumai i lenei luasefulu ma ona tupu tausaga, e leai a ma se containers, ia o a tupe e aumai ai na containers, fai mai ua ou alu a totogi ma aumai mea ou te mana’o a’u i ai. O le tulaga la lena, a su’e i tai i le Customs e leai a ma se mea na ou alu atu e kilia mai ai sa’u container.
O le tulaga lena e lelei foi lele, auã e le taumatea e leiloa poo lima ta’ita’ia ia si tama sia e ni ripoti atu foi a ni au ‘aufaitala le faavaea o loo alu atu i inei. Aua e manatua o mea ia na tutupu i inei e le’i i ai i inei, e faapefea la ona ia iloa ia mea?
Ia ae faapena foi e le’o i inei foi, o lona uiga e leiloa poo i ai ni tagata na molia faapea; o lona avanoa la lea e avatu uma ai ia le ‘au vaega leia na avatua faamatalaga lế sa’o iã te ia, ia na mamã ai lea.
E mafai a; a sau loa le iuga e le faavaea, ia na faapea lea; ia faamalūlū atu foi i le Faamasinoga, sa ou talitonu o lea e sa’o a’u a o lea ua ou iloa na faavalea a’u e le vaega lea sa ripoti atu i inei, auã e toatele le vaega a le Sa Sa Ia Ga ia e feoa’i solo i i.
2AP
Lau Afioga o le vaiaso na te’a nei na faasalalau ai foi se tasi o ata video e le tagata e suafa ia Saute Sapolu ma ia fai ai foi ni lafoga ogaoga i lau Afioga.
Tuilaepa;
O la ua uma ona ou talanoa i Leoleo, se’i faafesootai atu ã i le Malo o Amerika, tasi lea terrorist o lea e fealua’i i o i Amerika lea e su’e e tagata.
Faaliliu i ai ana faamatagala ia ma ave i o i le CIA pe le’o tagata ia o lea e saili e Trump e toe faafoi mai i le atunuu na alu atu ai.
Ia a sau foi, ia ona maua foi lea o le avanoa e ave ai i Tafaigata e fai ai sana a’oa’oga lelei, ia ma aumai ai i le Faamasinoga.
O latou uma a ia o loo feoa’i ma poto moko e tatau na aumai se’i fai lelei se fesoasoani faatamã i ai.
Ae pau na o le tala e mafai ona ou faia i le taimi nei, aua o la ua lafo pea i leoleo e fai le latou galuega.
(1)
