Lisina o fanua faaleaganuu ma le Palemia

0
116

Ofisa Sooupu-Na saunoa faamalamalama le Palemia, Afioga Tuilaepa Dr Sailele Malielegaoi i lana polokalame i luga o le ala ata o le TV1 faatatau i le tãua tele o le lisi ina atu o fanua faa-le-aganuu.

E pei ona silafia o loo faagasolo taualumaga o le faamasinoga i le va o le Malo ma se tasi o vaega ua faaigoaina o le SSIG lea o loo latou tete’e malosi i le tulafono lenei o le Resitalaina o Fanua Faa-le-aganuu 2008 (LTRA-2008)

Saunoa Tuilaepa; “ua ova i le lua tausaga o feoa’i solo i le taulaga ma fai a latou talaiga, a’o lea la ua oo i le taimi o latou foi lea e omai e molia le Malo, a’o lea ua oo ane a i le taimi ua tolo faafia, Aisea?”

“Ua fiu e su’e ni mau e faamaonia ai, mea na e leaga ai lou taufaavalea, taufaavalea, taufaavalea ma pepelo solo tagata, ia oo loa i le taimi o le a tagofia loa mataupu, ia la ua feosofa’isolo e tau su’e ni mea auã na’o fuamoa mea la e feoa’i ma latou.”

“Ua leva ona faatali atu mo mea o laui’a; o Loia a le Malo, o le mea lea ua leva ona ou talanoa soo i ai, auã na omai fai mai o le a, ma le a ma le a; ae fai atu la se’i aumai ni faata’ita’iga e iloa ai nei mea pe mo’i, ia ae saū, leai e pau a le mea ne’i te’i ua tupu i Niu Sili ma Ausetalia, lea la ua fai atu ia o loa i o i Ausetalia ma Niu Sila e fai ai tou mau.”

“Ae aua tou te omai i inei auã o le Palemene o Samoa o lea e saofafa’i ai matai, o le tusia o tulafono o la e tusia e matai, o Minisita o le Kapeneta o Faamasino o Faipule o matai, ua e vaai la i ai.”

“A’o lea la e feoa’i solo ia tamaiti nei sa tafafao vale a i fafo omai ma le poto moko, omai loa lea ma le poto moko lea faapea a latou e omai ma a latou nanu ma latou a; ua atamamai ae na o le atili iloa atu ai e le lautele o le atunuu le faavasivasi tele.”

I faamaumauga i nisi o fanua faa-le-aganuu o loo lisi, ua faamauina o loo faamanuiaina ai nisi o aiga o le atunuu, saunoa Tuilaepa; “o le mea lena e aofia ai foi ma o i Sasina, la e faaoga lelei le pulega mamalu a Alii ma Faipule o Sasina, lisi ai o latou eleele ma maua ai a latou tupe, ae leai a se mea o fai i ai i o latou fanua, o la e o a latou i o latou fanua e faato’a.

“Pe o’o a i le faavavau e leai a se faletalimalo e fau ai, o le matuã atamamai o Alii ma Faipule o Sasina, a’o la e maua le latou tupe.”

“Afai la e taofi nei, e o la le vaega tautalaiti ia e ave ni tupe e ola ai Sasina, vaai la i ai mo le eseese mo mea o tamaiti tafafao tafafao a i fafo ae omai faafeagai ma toeaiina; a’o la e maua tupe a toeaiina i le latou lisi a’o la e le’i faia a se mea, pe uma ane na tausaga e le’i faia a se mea cancel loa e toeaiina, ia a’o la ua a’ea’e i nei seleni ua maua.”

“Lea foi la u e tãu’a Lufilufi, ia la ua manuia le aiga lea na lisi le latou fanua i le Mamona e fai ai le falesa, ia la ua uma le lisi a’o la ua toe tuumai le fanua o le aiga, ae o foi le Mamona toe fai le latou lisi i le isi eleele.”

“Ia lea la ua avea nei la le falesa Mamona ma fale o le aiga o la ua manaia le mea e nonofo ai, vaai la i ai mo le mea o le lelei mo le mea o le lisi, a uma a le lisi ua mau mea e nonofo ai le aiga, ae sa maua nai a latou tupe i nei tausaga na lisi ai.”

“Ia la ua maua le falesa ma mea uma, ua avea nei ma latou fale nofo, e mafai ona faapotu, fai faafaletalimalo e o atu tagata e nonofo ai ma maua ai a latou seleni.”

“Se o le faaoga o le mafaufau, a’o le nei mea o le feoa’i solo ma faalotoleaga tagata, e fiu a e faalotoleaga tagata e le valea uma tagata.”

Saunoa faaopoopo foi Tuilaepa;

“O le isi la mea a le vaega lea o loo fai nei o le o tauanau le faamalepega o nuu, faaoso tagata e foua le pule mamalu a Alii ma Faipule, ae fai a latou matai ae faasino o le aia tatau, o le aia tatau lea a le tagata a mana’o a ia e alu ese ia e fai lana nuu; fai na omai lea i le Malo e avatu tusi faamaonia o pule nuu; e le vãlea le Malo lenei.”

“O le mea lea e tu ai le Malo, o le malu puipui o tu ma aganuu a Samoa, a’o le vaega lea a le SSIG o lea e ‘alo i le mo le mea o le mea fai mai o le aia tatau, a’o le agaga la e i ai faamalepe nuu; e le valea ia le atunuu.”

“O le faamatai o le faamatai na ta’ita’ia maia le atunuu lenei i le tolu i le fa afe tausaga talu ai, o lea lava e malu ai le atunuu lenei.”

“O tagata nei e le malamalama i le faamatai, e lế saofafa’i i totonu o le saofaiga a matai, na’o na matai ma feoa’i ma igoa matai ae matuã le malamalama i le tu ma aganuu a Samoa o lea e fai nei.”

“E see ese loa le atunuu nei ma pulega a matai, ia ona oo loa lea ia Samoa le vevesi lea e oo i atunuu ia e leai ni a latou aganuu e pei o pulega ia faalenuu o loo mulimulitu’i ai ia tatou nei.”

“O le tulaga la lena i le vaega lea, ua ou te’i nei ua tu mai le tusi a le isi fai mai o le aia tatau a le tagata e faatu ai a lona ia nuu, ma fai ai ana ia matai; ou fai atu e le o se aia tatau le mea lena e puipui e le Malo, o le mea tonu lenã o lea ua e talanoa mai ia te a’u o le Ta’ita’i o le Vaega e Puipuia Aia Tatau; o aia na tou te faia o aia faa-le-tatau, ma e lế lagolagoina e le Malo lenei ni aia faa-le-tatau mo le mea o le fou o nuu ma pulega faamatai.”

“Ia o le mea la lena o lea e feoa’i ai nei ia le vaega lea, o le a foi le igoa o le mea, S S

 

TV1- S-S-I-G 

“S S I igaiga, ia lea a la ua talafeagai tonu ma lo latou igoa, ou te leiloa poo ai lea tagata na faaupua ia ituaiga mea faapea.”

“O le atunuu lenei na o le pau a le ituaiga aia e puipuia e le vaega lenei o le aia tatau, ae le puipuia ni aia faa-le-tatau.”