O le aso ananafi, Aso Lua 17 Iuni, sa iloilo ai e le Faamasinoga Faaitumalo se talosaga na faaulu e loia loo tulai mo le itu tetee i le mataupu o loo molia ai le afioga ia Laaulialemalietoa Leuatea Schmidt ma isi.
O le talosaga “No case to answer” e talosagaina ai le faamasinoga e faamuta loa le mataupu ona e le o iai ni molimau maumaututu a le itu a leoleo.
I taualumaga o le faamasinoga i le mataupu e pei ona silafia o loo tuuaia ai Laaulialemalietoa, Fepuleai Faimata Su’a, Lio Faataumalama Auava, Lise Marie Schmidt, Samuelu Fauena Sua ma Sivai Kepi.
Na valaau le mataupu i le taeao o le Aso Lua i luma o le faamasinoga na tulai ai Richard Merchant ma faailoa o loo manino le molimau a Marie, ma e leai se vaega na faapea mai ai Marie na faiatu Laauli, “o lau tala lea e fai” e atagia mai ai se mea na fafau.
Finau le alii loia, o loo manino foi le molimau a Marie na faapea atu Laauli e tautala lava ia i le amiotonu.
“Afai na e iai i lena po na tupu ai le faalavelave, faailoa le mea na e vaai iai, ae afai e te le’i iai, tautala oe ete le’i iai.”
E faapena foi ia Lise ma Fepuleai, e le o iai foi se vaega o ta’ua ai o Fepuleai ma Lise sa la fafauina ni faamatalaga.
E faapena foi se finauga a Maposua Tanya Toailoa. Sa ia finauina na valaau Laauli ia Li’o e alu atu i lona ofisa, ae taunuu atu Lio o loo iai i le ofisa o Laauli le Minisita o Leoleo ia Faualo Harry Schuster ma le Komesina o Loleo.
Finau Maposua, o le manatu la o L’io, o loo fetaui lona faia o suesuega e tusa ma le faatonuga aua o lea e iai le Minisita o Leoleo ma le Komesina o le Matagaluega o leoleo.
Ae ina ua tali le tamaitai loia Prosecutor ia Leinafo Taimalelagi Strickland, sa ia finau ai – ua vave tele ona tuuina mai lenei talosaga o le no case to answer.
E ui ua fulitua mai le molimau autu a leoleo o Marie, ae e le’i taitai lava uma molimau a leoleo.
O loo iai le isi molimau autu a leoleo o Tupuola Tanu Wright, o loo molimau i talanoaga a Samuelu ma Sivai.
Na tula’i le tamaitai loia o Muriel Lui, ma faapea atu, “O mau o loo talanoa ai le loia a le itu a leoleo, o tala faalogo e leai se faamaoniga ma e le tatau e le faamasinoga ona faaaogaina.”
Na fesili le Famasino Sinia o le Faamasinoga Faaitumalo ia Talasa Saaga Atoa i loia Samoa pe na iai se faamasinoga na tupu muamua ai le tulaga lea o le no case to answer ae na tali Maposua Tanya Toailoa, e leai.”
Na tulai le tamaitai loia o Kathryn ma faailoa i le faamasinoga o Niu Sila e leai se taimi faatapulaa e faaulu ai se talosaga o le no case to answer.
Ua faatulaga e le faamasinoga le Aso Lulu 18 Iuni e fofogaina mai ai lana faaiuga i le talosaga a le itu tetee, no case to answer.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
