Ua tuuina mai se faasalaga falepuipui a se tina, 57 tausaga le soifua, ina ua faamaonia lona faapapaina lea o se laau malosi na faamanu’alia ai se tasi o alii sa vevesi ma lona toalua.
O Leulua’ialii Selesitina Vaaulu, ua nofo sala nei i le toese mo le 10 masina ina ua faamaonia ona moliaga i se faalavelave na tula’i mai i le tausaga 2019.
I faamaumauga a le itu a leoleo sa faailoa ai e faapea, o le masina o Oketopa 2019, na agai atu ai nisi o taulele’a ma la’u atu ni maa e poloka ai luma o le latou fale. Sa avea lea ma mea ua pupuni ai le auala taavale e agai atu i le fale.
Na tulai mai ai loa se feeseeseaiga i le va o taulelea ma le toalua o Selesitina. Na oo ai lava ina ua fa’aaogaina e le toalua o Selesitina se paipa e sasa ai se tasi o alii talavou.
Sa atili ai loa ona vevesi le va o taulelea ma le toalua o Selesitina, ae maise ua laga atu nei taulelea e faaoolima i le toalua o Selesitina.
Na savali mai i fafo Selesitina mai lona fale ma le laau malosi o le ituaiga 12 ma ia faapapaina loa.
O lona faamoemoe, ina ia tutuli ese ai taulele’a, peitai, na lavea ai le nofoaga o se tasi o alii ma faanatinati atu ai i le falemai.
Na saunoa le afioga i le Faamasino, Justice Leiataualesa Daryl Clarke, o le uumiaina o se laau malosi ma faapāpā, o se gaigoiga e ogaoga tele i le vaai a le tulafono. O lea e tatau ai ona tuuina mai se faasalaga e fetaui lelei ma le soligatulafono sa faatino.
O le laau malosi fo’i sa faaaogaina e lea tinā, e le o se aupega e faatagaina i Samoa nei.
O moliaga a le itu a leoleo e aofia ai le faaoo man’ua tugā, uumia o se aupega matautia, ma le uumia o se aupega e lē faatagaina faasolitulafono.
E lua tausaga i le toese sa amata ai le faasalaga, ona toese mai ai lea e le Alii Faamasino nisi masina e tusa ai ma itu ua masani ai ma faatagaina e le tulafono. Ona totoe mai ai lea o le 10 masina o le a nofo sala ai lea tinā i le toese i Tanumalala.
Faasalalauga Faalauaitele
