Molia se Tamā Matua i le Ave Taavale Matautia ua o’o ai le Maliu i se Teineitiiti

0
28

E 59 tausaga o se tamā ua molia i le ave taavale matautia ua oo ai le maliu i se teineitiiti e ono tausaga.

O lea faalavelave na tulai mai i le Aso Faraile o le vaiaso talu ai i Mulivai Safata.

E pei ona tā’ua e le Sui Komesina ia Papalii Monalisa Tiai-Keti, o le tuua ai o aoga na lavea ai lenei teineitiiti.

“Sa ia taumafai e kolosi le auala, peitai, na taia e le taavale ma faanatinati atu ai i le falema’i i Motootua.”

“O le aso Faraile lea, ae o lona fā o aso talu ona taofia i le falema’i na maliu ai.”

Saunoa Papalii, ua toe suia le moliaga mai le ave taavale faatamala ua man’ua ai se isi – i le ave taavale matautia ua mafua ai le maliu (dangerous driving causing death).

O le Aso 25 o le masina nei o le a tulai ai lea tama e tali atu i ona moliaga.

O le tulai mai ai o lea faalavelave ua toe aumai ai ma se tuualalo a le Sui Komesina i le atunuu.

“Ia tautuana le saogalemu o le fanau ia ave iai le faamuamua. E tatau lava ona iai se tagata matua e na te pikiina fanau mai le tuua ai o aoga.”

Sa momoli mai ai foi ma se tuulalo ia i latou o loo faafoeina soo se sā. “Ia foe ma le mataala mo le saogalemu o fanau i luga o ala tetele aemaise o taimi tuua o aoga.”