Ua tele upu i man’u aua o lea ua tu le ala ma le mila sa fita iai le Ekalesia.
O le saunoaga lea a le Susuga ia Fata Tulasunui Talalelei, le Failautusi a le Ekalesia Faalapotopotoga Kerisiano Samoa (EFKS) i Afega ina ua faapaia i le aso Faraile na tea atu nei le galuega sa gapatia iai le Ekalesia i le fauina lea o le latou hall.
Sa saunoa Fata, e valu (8) masina na faatino ai le galuega i lona tau aofai e $700,000 tala Samoa. O le Ekalesia i Afega, e i le va o le 60 ma le 70 matafale.
Sa faamanuiaina le galuega i le aao foai a nisi i aiga, paaga ae maise o lupe faalele faapea alo ma fanau o loo papa’aao i atunuu i fafo.
O le seleni a le Ekalesia na amata ai le galuega e $50,000 tala. Na fesoasoani mai foi le Ekalesia i Malua ma foai le $50,000.
“Sa fesoasoani mai le mafutaga a alo ma tama fanau i Aukilani ma Ueligitone i Niu Sila.. O le Susuga i le Faifeau Toeaina ia Taimuaalii i Ausetalia, ma nisi foi o lupe faalele a lenei afioaga..”.
Sa faaalia e le Susuga i le Failaitusi, o loo galulue le Ekalesia i se fuafuaga faataatia mo le totogiina o le aitalafu i totonu o le fa (4) tausaga.
“O le taimi nei o loo lelei le faatinoga o le aitalafu o loo matou galulue faatasi ai ma le faletupe, ina ia oo atu i le 2025 ua maea”..
Saunoa le Failautusi ua maea ona toe faafou le malumalu, ae o le vaega lona lua lea ua tulai mai ai le galuega o le hall.
“O le vaega lona lua lea o le matou polokalame, ae o le vaega lona tolu o le maota o matou matua faaleagaga, ma le vaega lona fa o le fausia lea o le pa e siomia ai le laufanua nei”.
Ae na saunoa foi Fata e faafetaia le paia o le laulau a fono a le Ekalesia i Malua, o uo ma aiga, alo ma fanau a le afioga o loo alala ma papa’aao i soo se tulimanu o lenei kelope ma soo se tasi sa aao mafola i lenei galuega.
Sa saunoa foi le Failautusi i le toatele o sui iloga o le atunuu o loo latou galulue faatasi i le Ekalesia i Afega.
“O nisi o matafale iloga o lenei Ekalesia e iai le afioga ia Gatoaitele Savea Sano Malifa, le afioga ia Ututaaloga Charlie Ulia, le Afioga i le Faipule ia Maulolo Tavita Amosa, faapea foi Fata Meafou ma Fata Ryan Schuster”.
(12)
