
O le itula e 10:05 i le taeao nei, na fa’ailoa ai e le Fofoga Fetalai, le Afioga ia Auapa’au Mulipola Aloitafua, le fa’amaloloina o Fonotoe se’ia aulia le itula e 10:05 i le taeao o le Aso Lulu 28 Oketopa.
Na saunoa le Fofoga Fetalai, “Ua solia e Fonotoe Tulafono Tumau a le Palemene.”
O le fa’amalologa na afua mai i ni saunoaga a Fonotoe i se fa’atalanoaga na fa’asalalau i luga o le initaneti. Peita’i, e le’i manino mai poo a tonu saunoaga patino na fa’avae ai le fa’ai’uga.
Na fa’atū ma fa’aluaina le lafo e fa’amalolo ai Fonotoe e sui o le Kapeneta, ma palotaina ai ma pasia e le Palemene.
A’o le’i faia le lafo, na saunoa le Palemia, Afioga Laaulialemalietoa Polataivao Leuatea Fosi Schmidt, ua avea le Mālō ma le Kapeneta ma taula’iga o faitioga i luga o le upega tafailagi, e aofia ai le ta’ua o lana ta’ita’iga o se “pule fa’ahikila”.
Na taumafai Fonotoe e tali atu i tu’uaiga a’o le’i tu’ua le Maota, peita’i e le’i tuuina atu e le Fofoga Fetalai iai se avanoa e saunoa ai.
O Fonotoe o se tasi o sui pito leva i totonu o le Palemene o Samoa. Na ulua’i ulufale Fonotoe i le Palemene i se faigāpalota laititi i le 2005. Sa avea ma Sui Palemia ma Minisita o Pisinisi, Alamanuia ma Leipa mai le 2011 i le 2016.
Na toe filifilia o ia e avea ma Sui Ta’ita’i o le HRPP i le 2021, ma sa avea fo’i ma Ta’ita’i o le Itu Agai mai iā Ianuari iā Iulai 2023, a’o fa’amalolo Tuilaepa Sailele Malielegaoi.


- Cabinet Terminates Health ACEO Over Missing Oxygen Cylinders - November 16, 2026
- “Do Not Waste this Opportunity” Judge Issues Stern Warning to Teen - November 8, 2026
- Man Pleads Guilty to Threatening to Kill Samoa’s Prime Minister, Awaits Sentencing - November 8, 2026













