O le Aso Faraile nei e faamuta aloaia ai le auaunaga a nisi o faamasino o le Faamasinoga o Fanua ma Suafa.
O le afioga ia Tuioti Sakaria Taituave, Iuga Sefo Fautuaalii ma Tuilagi Saipele Esera o ni tamalii sa faatautoina e fai ma faamasino o le Faamasinoga o Fanua ma Suafa i le Aso Tofi 15 Aperila 2021, ma o le masina nei e atoa iai le lua tausaga talu ona galulue.
Sa faatautōina i latou i le Aso 15 Aperila 2021 ina ua maea ni su’ega faapea ma ni faatalatalanoaga (interview) lea sa filifilia mai ai i latou nei mai le toatele o tamalii ma failauga na apalai mo nei tofiga tāua ina ua faasalalauina.
Peitai o le vaiaso nei na tuuina mai ai se finagalo o le Komisi o le Faamasinoga o Fanua ma Suafa, ina ia faamuta aloaia latou auaunaga i le tofiga faamasino.
“O le a faamuta aloaia lau auaunaga faa-faamasino o le Faamasinoga o Fanua ma Suafa, i le Aso Faraile, Aso 3 Mati, i le 5pm.” (Faamamafa o loo lomiaina i le tusi).
O le Komisi o le Faamasinoga o Fanua ma Suafa, o le komiti foi lea sa latou tofiaina nei faamasino e toatolu, ma fautuaina i latou e fai ma faamasino.
O le mafuaaga o le faamutaina o le auaunaga a nei tamalii e pei ona tuuina mai i se tusi e sainia e le failatusi a le Komisi, Papalii John Taimalelagi Afele, ona;
“O tofiga sa faia ia Aperila 2021, e lē tusa ai ma le tulafono ma le Faavae (unlawful and unconstitutional) ma e le tusa ai ma moomiaga i lalo o le mataupu 104E (4) o le faavae. O nei tofiga sa faia e aunoa ma aiaiga faaletulafono e aiaia ma lima taitaina ai le Komisi i le faatinoga o lana matafaioi, e pei ona moomia i lalo o le Mataupu 104E(4) o le Faavae.”
O loo tā’ua foi i le tusi a le Komisi, o lea ua ma’ea ona pasia e le Palemene le Tulafono, o Teuteuga o le Tulafono o Fanua ma Suafa, 2022 (Lands and Titles Amandment Act 2022 ) (“Tulafono Teuteu”).
O le mau a le Komisi, o lea la ua taatia mai i le taimi nei, i lalo o le Tulafono Teuteu ni aiaiga mo le tofia ai o faamasino o le Faamasinoga o Fanua ma Suafa, ma ua mafai ai loa la ona faatino le latou matafaioi e pei ona aiaia i lalo o le Mataupu 104E (4) o le Faavae.
Peitai, o le mau a le Komisi, “E le o aloaia ma faasaoina (validated and saved) i lalo o lenei lava Tulafono Teuteu, tofiga e pei ona faia ia Aperila 2021. E na o tofiga o faamasino sa faia i lalo o le Tulafono 1981 ua faasaoina.”
E ui ina faamuta le auaunaga a Alii Faamasino ua lua tausaga o galulue ma latou iloiloina faaiuga o le Faamasinoga o Fanua ma Suafa, o loo iai lava le avanoa e toe apalai mai ai ma toe tōfiaina. E pei ona tuuina mai e le Komisi i le latou tusi;
“E ui i lea o loo iai pea le avanoa e mafai ai ona e toe talosaga i avanoa faamasino o le Faamasinoga Muamua o Fanua ma Suafa, e tusa ma aiaiga ma agavaa moomia i lalo o le Vaega 5 A o le Tulafono o Fanua ma Suafa 2020.”
Na tā’ua e se molimau faatuatuaina, o lenei mataupu sa le maua se tasi o finagalo o le Komisi, ma saili ai loa lea se fautuaga mai le Ofisa o le Loia Sili.
Na taumafai atu se fesootaiga o le tamaitai Loia Sili ananafi, peitai, e lei maua se avanoa e fesiligia ai, pe faapefea la iuga uma o mataupu sa iloiloina e nei tamalii ao fai i latou ma Faamasino o le Faamasinoga o Fanua ma Suafa, mo tausaga e lua.
Sa taumafai atu foi se fesootaiga ma le Failatusi o le Komisi, ae lei manuia foi.
(1)
