E tusa ai ma le vaega 36 ma le 39 o le Tulafono 1972 a le Faaputugatupe mo le Lumanai Manuia o Tagata, ua faamaonia ai nei e le Komiti Faatonu ma le Pulega le totogiina atu o faamanuiaga faapitoa e tusa lona tau aofai ma le $42.35 miliona tala aua le faamanatuina o le Iupeli Auro a le faalapotopotoga.
O nei faamanuiaga ua faatulagaina faapea:
1. Totogi tupe atu o le 5% faapitoa mo sui fai saofaga uma o le NPF i totonu o le tausaga 2022 i lona tau aofai e $41.64 miliona tala. O aiaiga nei o lenei faamanuiaga:
•3% o le a mafai ona totogiina atu e faaaoga mai ai le upega tafailaga e amata atu i le Aso Lua 12 Aperila 2022.
•2% o le a mafai ona totogiina atu ia Tesema 2022.
2. Faamanuiaga faapitoa e tai $50 tala mo sui lesitala uma o le penisione a tagata matutua e tusa lona tau aofai ma le $580,000 tala. O le a tuufaatasia ma le penisione masani ona maua ai lea o le tai $250 tala a le sui penisione mo na o le masina lenei o Aperila.
O le a tuu mai i luma le totogiina atu o lenei faamanuiaga i le Aso Lua 12 Aperila 2022 e totogi sao atu i faletupe e fa i le tatou atunuu faapea ma le Western Union ma le Fale Meli e pei ona masani ai i masina taitasi.
3. Faamanuiaga faapitoa e tai $10,000 tala mo faalapotopotoga faapitoa e toa sefulumaletolu i lona tau aofai e $130,000 lona tau aofai.
(Samoa Victim Support Group, Samoa Cancer Society, Nuanua o le Alofa, Aoga Fiamalamalama, Loto Taumafai, Mapuifagalele Home, Samoa Cancer Society, Samoa National Kidney Foundation, Senese, Teen Challenge, Goshen Trust, Salvation Army ma le St Vincent de Paul Society)
O le aso mulimuli e mafai ona tala ai i tua le faamanuiaga o le 3% o le Aso 27 o Me 2022 ma o ni tupe uma e lei talaina i tua o le a toe tuusao atu i faaputugatupe a sui faisaofaga.
O le a le mafai ona maua nei faamanuiaga tau tupe i soo se ofisa o le NPF seia vagana ua toe foi le tatou atunuu i le tulaga o vavao faatulagaina mo faalavelave faafuasei o le koviti.
TULAGA 1. E fautuaina ai sui fai saofaga uma a le tatou faalapotopotoga e lesitala ma faaaoga mai le upega tafailagi e faamatuu atu ai a latou faamanuiaga.
O le faaneetaga, faafetai ma le viiga atoa e tuuina atu i lo tatou Atua Silisili Ese, le Alii o Iesu, ona o le faulai o lona alofa tunoa i le NPF i nei tausaga e 50 ua mavae atu. Viia lona suafa paia.
Faafetai ma ia manuia le Eseta,
KOMITI FAATONU MA LE PULEGA
