I se feiloaiga a ofisa faasalalau ma le Komiti o Tapenaga mo Aso Fiafia, sa latou faailoa ai ni fuafuaga mo polokalame ma faafiafiaga o le a faatinoina mo le faaiuga o lenei tausaga.
O loo taitaia lenei Komiti e Tanuvasa Petone Mauga, o le Komesina o Tineimu, faapea foi le Fanaea Taulealo, o le Sui o le Pulega Tagata Tafafao Maimoa mai Fafo (STA) ma le Sui Komesina o le Matagaluega Leoleo ma Falepuipui, Papalii Monalisa Tiai Keti.
Na uluai saunoa ai Fanaea, “O le 5 i le afiafi o le Aso Lulu 21 Tesema o le a faatino ai se solo e amata mai Vaisiagano seia paia mai luma o le Maota o le Malo…
“O lea solo o loo tatala le avanoa mo soo se faalapotopotoga, kamupani, matagaluega, ma soo se isi lava e fia auai, atoa ai foi ma taavale teuteuina o le a faamatagofie ai lea faamoemoe..
“O le ma’ea ai o lea solo o le a sosoo ai ma faafiafiaga sui fefiloi.”
Saunoa Fanaea, o le Aso 22 ma le Aso 23, o le a faaauau ai faafiafiaga i le Friendship Park i Matagialalua, ae o le Aso 31 o le a faapena ona toe faia ai faafiafiaga e tālia ai le taimi o mea faapāpā (fireworks).
Ae na saunoa le Komesina o Tineimu ia Tanuvasa Petone, o lenei tausaga o le a iai se suiga i mea faapapa.
O le tausaga talu ai na faa’oagaina ai luga o le mauga o Vaea, peitai, o lea ua iai le suiga o le a faa’aogaina luga o se vaa e taula mai gatai i le sami e faatino mai ai tatou fireworks, e pei ona faia I le tausaga 2019.
“E faapena foi le motu tele i Salafai o le a faatautaia lea i Amoa Siufaga Savaii mea faapāpā..”
Ao alo atu le atunuu mo le faailogaina o aso fiafia, ua aumai ai foi se tuualalo a le Matagaluega o Leoleo e tauala mai le Sui Komesina, ia tautuana le saogalemu.
“O ia aso o le a tele foi matua ma aiga o le a agai mai ma fanau, ae ia tautuana le faamuamua o le saogalemu..”
E le gata i lea ae ua lapata’i mai foi Papalii i le mamalu o le atunuu, e le faatagaina le taumafa ava malosi i nofoaga faitele (public places).
“O le a faatino pea le tiute a le Matagaluega mo le faamalosia o le tulafono, ma e ao foi i le mamalu o le atunuu ona usitaia.”
