I le feiloaiga a le susuga ia Tuilaepa Sailele Malielegaoi ma le vasega o tusitala i le vaiaso ua tea atu nei, sa ia toe faamanatu ai ni tulaga sa mafua ai ona taofia le faaogaina o le Malae Vaalele i Fagalii e le faigamalo ua mavae atu nei.
“E tele lava le aafiaga o le toe tatalaina o le malae valele i Fagalii. Tatou iloa foi o le malae vaalele lenei lea e tele na sao mai ai fualaau faasaina ma aisa;
“E faigofie a ona fesootai ma isi vaega lea e iinei e oatu e auala solo atu i taxi. Ma le isi mea, ua vaelua ai le au faigaluega a le malae vaalele (Faleolo ma Fagalii) ma atili ai na salalau tele, ma atili ai ona sao mea ia”.
Sa saunoa Tuilaepa, o le mafuaaga tāua i le latou faaiuga sa fai, o le saogalemu lea o femalagaina.
“O le mea pito sili lava ona matautia o le puupuu o le malae vaalele e le o taitai ona maua le umi. O le tele o taimi e tau taofiofi le alu o se vaa..”
Sa faailoa e le susuga ia Tuilaepa e faapea, e ono tulai mai ni faafitauli i le puupuu tele o le alavaa o le malae vaalele poo le runway.
“O vaalele nei ona e saoasaoa tele, nao le tau lavea tau lavea o vaa i le malae vaalele i Fagalii ona e puupuu tele..”
O le mau a le taitai a le HRPP, sa iai se taumafaiga ao latou tauaveina le Malo e faaumi pe extend le malae vaalele.
“Ua leva foi la ona taumafai i se tulaga foi lelei e faaumī ai, ae e le mafai ona e vanu atoa tala atu, ae o fale o aiga le isi itu..
“E sili atu lava la ona puipuia Faleolo nai lo Fagalii. O le ala lena sa alai ona taofi”. J
Ua manatu le susuga ia Tuilaepa i le mafuaaga ua alai ona mananao le vaega faaupufai a le FAST e toe tatalaina lenei malae vaalele,
“Ae o le mea lea oute vaai atu ai,O lea e naunau iai le malo e tau a ina atagia ua iai se suiga, ae tatau ona vaai I le tulaga o le puipuiga.”
Ua savali nei le 4 tausaga talu ona tapunia lenei malae vaalele ma avea ai lea nofoaga e pasi ai ave taavale ma laisene o taavale ma nofoaga mo leoleo.
Sa taumafai atu le Samoa Global News e maua mai se faamatalaga o lenei mataupu ma maua se avanoa e faatalatalanoa ai se susuga i le Minisita o Galuega, Felauaiga ma Atinae Eseese ia Olo Afoa Fiti Vaai. Sa oo atu lava i le ofisa e taumafai e maua mai se fesootaiga, peitai, sa faapea mai le susuga i le failautusi o loo pisi lava le afioga i le Minisita, ae matua faasa lava ona tuuina mai se numera poo se imeli foi e mafai ai ona fesootai atu i le Minisita.
(6)
