E $34,000 se tupe ua faapena ona tuuina atu e le sosaiete tausi soifua e fesoasoani atu ai i sui auai uma o le asosi. Sa saunoa le peresetene o le asosi le afioga ia Solialofi Tua’imalo Papalii Pisimaka e faapea, “e 640 le aofai o teutusi sa tapenaina mo sui auai uma o le sosaiete tausi soifua, o se faamanuiaga tau tupe ua vaevaeina ai le $34,000 tala, ma ua tuuina atu i le aufaigaluega e fesoasoani ai mo latou aiga, ao faapena ona valavala ai ona o le tautuaina o le atunuu.
Saunoa foi le peresetene, o lenei fesoasoani o se toe faamanatu lea i le aufaigaluega tausi soifua, o loo tumau pea le faatauaina o lo latou valaauina. Oa lava faafitauli poo fita o le galuega, ia tulimata’i pea le ofoina atu lea o le soifua auauna mo le puipuiga o le soifua o le atunuu.
Ae na ta’ua e le teu oloa (treasurer) le afioga ia Faagasealii Sulu Sapoa, “O lenei seleni na toina mai i se teugatupe a le asosi tausi soifua, (Samoa Nurses Association) ma e pei o faiga masani a le sosaiete, e tipi ese mai le $10 tala mai totogi o tausi soifua (fortnightly). O le teugatupe a tausi soifua e faaagaga lea mo le atinaeina o le sosaiete aemaise o le avagalima lea o le sosaiete mo sana meaalofa pea maliu se sui auai.
O le taimi o le faatalanoaga ma le Peresitene, sa faamaoniaina ai ua silia ma le 120 le aofai o le aufaigaluega tausi soifua ua pesia ma aafia i le koviti, aemaise o le iai lea o le aufaigaluega i le latou togalauapiga, ao iai le atunuu i taimi ma’aleale ona o le pepesi o le faama’i i si o tatou atunuu.
Ua toe tuu’alalo mai ai le Peresetene le afioga ia Solialofi, ia tautuana le atunuu ia tatou galulue faatasi, e ala i le faatinoga o tui puipui, aemaise o le tausisia lea o auala o puipuiga, e pei o le va faatulagaina, o tali fofoga, ma ia tausisia le tumama lautele, tafa fale o maota ma laoa taitasi, ae sili ai o le vaaia faalelei o matua tausi faapea nai fanau iti.
